Gisukmag sa tulisan P12 mil nga sweldo nadala

CEBU, Philippines - Mihuboy ang ngabil sa usa ka factory worker sa Mactan Export Processing Zone (MEPZ) dihang gisukmag sa usa sa tulo ka wala hiilhing tulisan dihang nagdumili kini sa paghatag sa iyang sling bag nga gisudlan sa iyang salapi ug mahalon nga cellphone ala-una pasado ang takna sa miaging kaadlawon sa sitio Matumbo, barangay Pusok, dakbayan sa Lapulapu.

Ang biktima mao si Marlon Sinagote, 22, nagpuyo sa barangay Opao, dakbayan sa Mandaue ug nagtrabaho sa usa ka establisamento sa MEPZ sa barangay Pusok sa maong dakbayan.

Si PO2 Alin Bandolon sa kapolisan sa Presinto 5 sa Lapulapu City Police Office (LLCPO) nga nahinabi sa Banat News nga naglakaw paingon mag-atang og sakyanan ang biktima gikan sa paggawas sa iyang gitrabahoan.

Samtang nag-inusara nga naglakaw kalit kining gisugat sa tulo ka wala hiilhing mga lalaki nga pulos naggunit og kutsilyo nga gition ngadto sa biktima ug mideklarar og tulis.

Gibira sa usa sa tulo ka tulisan ang shoulder bag sa biktima kinsa nagdumili unta sa paghatag sa kabalaka nga madala ang iyang suweldong P12,000 nga bag-o pa niining nakubra sa ATM sa bangko sa maong dapit.

Apan nasuko ang mga tulisan hinungdan nga gisukmag ang biktima sa nawong sa makaduha ka higayon nga maoy hinungdan sa paghuboy niini ug human niini daling misibat pahilayo dala ang sling bag sa biktima.(EIM) (BANAT NEWS)