PESO nakatabang sa 5T kaping aplikante

CEBU, Philippines - Mikapin na sa 5 mil ka mga aplikante ang nakatrabaho sa mga nagkalain-laing mga kompanya sa Sugbo ug ingon man sa gawas sa nasud tungod sa gipahigayon nga mga job fair sa Provincial Employment Service Office (PESO) sulod lamang niining tuiga.

Kini ang gitug-an ni Capitol Consultant on Employment, Dra. Mathea Baguia kinsa mao usab ang nagsilbing manager sa PESO.

Matud pa ni Baguia nga ang maong mga aplikante dili lamang mga Sugboanon kun dili gikan usab ang uban sa kasikbit nga mga probinsya Sugbo sama sa Bohol, Leyte ug uban pa.

Sa samang higayon gipaniguro usab ni Baguia nga dili gayud mabiktima ang mga aplikante sa illegal nga mga recruitment agency kun moagi lamang sila sa PESO kay aduna may kompleto nga mga dokumento ang mga ahensya nga abagan sa Kapitolyo.

Sa samang higayon gi-awhag usab ni Baguia ang mga mayor sa kalungsoran sa probinsya sa Sugbo sa pagpasar og request letter sa buhatan ni Gobernador Gwendolyn Garcia aron sila matabangan sa PESO alang sa ilang job fair nga ipahigayon sa ilang lugar. Dugang pa niya nga ang maong lakang maoy nakahimo sa PESO dinhi sa lalawigan sa Sugbo nga napiling usa sa Top Regional Performer and Nominee for national best PESO. (BANAT NEWS)