CEBU, Philippines - Tabangan sa Provincial Women’s Commission (PWC) ang 75 anyos nga lola nga gitulis ug gilugos niadtong miaging kaadlawon didto sa Sitio Upper Katugasan, Barangay Can-asujan, dakbayan sa Carcar.
Ang co-chairperson sa PWC Vice Governor Agnes Magpale nagkanayon nga nakigtambayayong na sila sa Provincial Social Welfare and Development (PSWD) office pinaagi sa hepe sa maong buhatan nga si Marivic Garces.
Kini aron mahatagan dayon ang probinsiya ug aron daling maasikaso ang kahimtang sa nahisgutang biktima.
Gipahibawo ni Magpale nga ang paghatag og tabang sa probinsya sa Sugbo ilabina na sa mga kababayen-an ug ingon man sa mga kabataan walay gipili nga edad.
Nasayran nga ang maong lola, human sa pag-rape, gidala pa ang P34,000 nga cash sa biktima ug gikulata pa kini sa wala hiilhing manlulugos ug tulisan. (BANAT NEWS)