CEBU, Philippines - Pormal na nga giduso ni Mayor Michael Rama didto sa buhatan sa hepe sa Presidential Management Staff nga si Herminio Bagro ang position paper niya kalabot sa Malacañang of the South.
Taud-taod na nga isyu nga gustong kuhaon pagbalik sa Bureau of Customs (BOC) ang maong building apan supak si Rama niini gumikan kay gusto niya nga ipreserba ang maong edepisyo ug magsilbing historical heritage ug landmark.
Matud pa ni Rama nga angayan gyud nga imentinar ang historical value sa maong dapit ug nakadugang usab kini sa kanindot sa palibot sa Fort San Pedro ug Plaza Independencia.
Nalatid sa suwat ni Rama nga haom na kaayo ang kasamtangan buhatan karon sa BOC nga nahimutang sa utlanan sa siyudad sa Sugbo ug sa Mandaue ug dili na maglisod ang mga tawo sa nahisgutang duha ka local government units kung duna silay transaksyon sa maong ahensiya.
Unya duna pa gyud kini saktong parkingan sa mga sakyanan busa dili na angay nga ibalik pa ang BOC sa karaan nila nga puwesto ilabi na nga ang parking space sa Plaza Independencia maoy lugar nga parkingan sa mga sakyanan sa mga turista.
“Available spaces within the vicinity of the Plaza Independencia and Fort San Pedro may be available for parking, but exclusively for tourists,” suma pa sa mayor.
Nagmalaumon ang mayor nga makakuha og positibong tubag gikan sa Palasyo. Ang nahisgutang edipisyo gihimong opisyal nga residensya ni kanhi presidente Gloria Macapagal Arroyo niadtong 2004. (EIM) (BANAT NEWS)