CEBU, Philippines - Ang suspetsadong tulisan nga si Noel Simbajon kinsa giingong maoy mipusil patay kang PO1 William Mangubat Jr. nagtukod og grupo sa mga tulisan didto sa Mindanao kansang target nilang tulison mao ang mga bus nga pasaheroan.
Si Chief Inspector Eddie Recamara, officer-in-charge sa Talisay City Police Station (TCPS) mibutyag kagahapon sa mga tigbalita nga nakadawat siya og impormasyon gikan sa kapolisan sa Tangub City Police Station kalabot sa kalihokan ni Simbajon kansang giplanohang tulison niini mao ang mga bus nga nagbiyahian gikan sa Dipolog paingon sa Ozamis ug Cagayan.
Si Simbajon didto mopuyo sa iyang mga iyaan sa barangay Bintana, Tangub , City Misamis Occidental ug ang mga residente sa maong barangay maoy mihatag og impormasyon ngadto sa kapolisan bahin sa kalihukan ni Simbajon.
Matud ni Recamara nga sa lihok ni Simbajon matawag nga usa na siya ka big time nga tulisan.
Gibutyag sa OIC nga si Simbajon ilang nailhan tungod sa hulagway sa mga patik sa iyang lawas apan ang iyang hitsura lisud na maila gumikan sa kataas na og buhok ug bungot niini.
Sa laing bahin gibutyag ni Recamara nga gihimakak ni Simbajon nga siya maoy mipusil patay kang PO1 Mangubat ug ang gitudlo niini mao ang magsuong Lito ug Jundee Oros kinsa padayon pa gihapong nagtago-tago.
Si Simbajon misulti sa mga polis nga human sa insidente niadtong Marso 11, 2011 sa sitio Mananga nagbuwag-buwag na sila ug ang magsuong Oros ug wala na sila’y komunikasyon sukad niadto.
Apan matud ni Recamara nga bisan og wala silay nakuhang kasayoran gikan kang Simbajon duna na silay impormasyon karon sa nahimutangan sa magsuong Oros. Kagahapon sa buntag si Simbajon gibalhin na ngadto sa Talisay City Jail.
Samtang gibutyag usab ni Recamara nga ang P100 mil nga premyo sa makatudlo sa trigger man ni PO1 Mangubat iyang girekomendar nga adto ihatag sa Tangub City Police Station tungod kay sila man ang adunay dakong papel sa pagsikop kang Simbajon. (BANAT NEWS)