Ex-kap naabswelto sa pangawkaw

CEBU, Philippines - Giabswelto sa korte ang kasong six counts of malversation of government funds ang kanhi kapitan sa barangay Panadtaran sa lungsod sa San Fernando. Si Catalino Baysa, kanhi kapitan sa nahisgutang barangay gireklamo sa usa ka Edwardo Natividad nga mibulsa sa honorarium sa kanhi kagawad Lowell Teves gikan sa Septiyembre 2001 ngadto sa buwan sa Enero tuig 2002.

Si Natividad mipasangil kang Baysa nga gikopya niini ang pirma ni Teves aron makuha ang honorarium sa maong kagawad nga P2,300 matag buwan nga niadtong Enero 2002 mi-umento na ngadto sa P2,900 ang honorarium.

Si Baysa giingong mipirma usab og dokumento aron ma-release ang P2,500 nga year-end bonus ni Teves sa buwan sa Disyembre.

Atol sa husay sa kaso ang prosekusyon mipresentar sa barangay treasurer nga si Reynaldo Pangahin.

Gibutyag ni Pangahin nga dunay mga entry sa payroll nga bisan og absent si Teves nga walay official leave gihatagan gihapon kini sa iyang honorarium. Sa 13 ka pahina sa desisyon ni Regional Trial Court (RTC) Judge Eric Menchavez nagkanayon kini nga base sa testimoniya ni Pangahin walay nakita ang korte nga si Baysa dunay kalambigitan sa pag-release sa honorarium ni Teves.

Matud usab ni Menchavez nga walay nakita ang korte sa testimoniya ni Pangahin nga ang kwarta iyang gitugyan ngadto kang Baysa ug ang kanhi kapitan mao nay mitunol sa honorarium ni Teves.

Sila si Evelyn Geocallo, kanhi barangay secretary ug Grethel Ortega kinsa opisyal sa Department of the Interior and Local Government (DILG) sa San Fernando niadtong higayona gipresentar usab nga mga witness sa prosekusyon.

Sa testimoniya ni Ortega nagkanayon kini nga si Teves absent sulod sa lima ka buwan ug ang honorarium niini gi-withdraw gikan sa bangko.

Apan si Teves mihimakak nga mikobra siya sa iyang honorarium sa mga buwan nga absent siya ug matud usab niya nga walay pormal nga suwat nga nagpahibawo sa konseho sa barangay nga mi-resign siya isip kagawad.

Matud ni Teves nga nagdahom gihapon nga sakop pa siya sa konseho, giangkon usab niyang duna siya’y loan sa Postal Bank Inc. ug Rural Bank of Barili Inc. nga sila si Pangahin ug Baysa ang iyang mga co-maker.

Ug ang barangay treasurer gi-authorized sa pag-deduct sa iyang payroll sa iyang madawat nga kwarta isip kagawad aron ibayad sa iyang utang.

Nasuta sa korte nga walay lig-ong mga ebidensiya ang kasong gipasaka batok sa kanhi kapitan hinungdan nga giabswelto kini. Ang Korte mimando usab sa pag-uli sa P120 mil nga piyansa ni Baysa niadtong Disyembre 2007. (BANAT NEWS)