Plantasyon sa MJ nadiskubrehan

CEBU, Philippines - Duha ka gagmay’ng plantasyon sa marijuana ang nadiskubrehan sa militar sa dakbayan sa Danao ug Carmen apan walay bisan usa sa mga nananom ang nadakpan.

Mokabat sa 447 ka punoan sa marijuana ang gilarot sa mga awtoridad kagahapon sa alas-8 pasado sa buntag sa bukirang dapit sa barangay Magtagobtob sa dakbayan sa Danao.

Si Jessie Tabanao, tigpamaba sa Philippine Drug Enforcement Agency (PDEA) Central Visayas nga nahinabi sa Banat News mitug-an nga ang Philippine Air Force maoy nakadawat sa maong impormasyon nga dunay plantasyon sa marijuana sa maong lugar ug daling nakig-alayon kanila.

Giumol dayon nila ang hiniusang puwersa sa Criminal Investigation and Detection Group (CIDG)-7 uban sa air force aron rondahon ang maong plantasyon ug ilang nalarot ang 300 ka punoan nga fully grown ug 147 ka stalks sa marijuana.

Matud ni Tabanao atol sa ronda nakaikyas ang nagtanom sa punoan sa marijuana ilawom sa mga kakahoyan nga giila lang sa pangan nga Hernan nga ilaha gihapong pasakaan og kaso karung adlawa. Sa laing operasyon sa sitio Tagani sa barangay Kawrasan lungsod sa Carmen niadtong Miyerkules sa alas 6:00 sa buntag naibot sa mga sakop sa Echo Company, 52nd Infantry Battalion pinangulohan ni Sgt. Antonio Punzalan ang 147 ka punoan sa marijuana nga gisagol sa kalibunan samtang sila nagpatrolya.

 Matud ni SPO2 Dimplicio Gibo sa Carmen Police Station dihang nahinabi sa Banat News walay nadakpan ang mga sundalo nga maoy nananom niini. (BANAT NEWS)