'Killer' nausab human mamatyi og anak

CEBU, Philippines - Ang suspetsadong tulisan kinsa maoy giingong utok sa pagpusil patay kang PO1 William Mangubat Jr. nangayo og proteksiyon sa media sa kahadlok nga pasakitan siya sa mga polis nga misikop kaniya.

Si Analiza Gamboa, 28, taga sitio Mananga, barangay Tabunok, dakbayan sa Talisay ug kapuyo sa suspetsadong si Noel Simbajon, 29, miadto kagahapon sa buntag sa buhatan ni Bise Mayor Alan Bucao ug nagpakitabang kabahin sa hangyo ni Simbajon.

Matud ni Gamboa nga wala siya magdahom sa binuhatan ni Simbajon tungod kay kaniadto tarong man kini og trabaho apan diha lang kini nausab dihang namatay ang una nilang anak sa sakit nga leukemia.

Wala nila masustineri ang pagpatambal niini tungod sa kawad-on ug sukad niadto nausab na si Simbajon.

Si Bise Mayor Alan Bucao sa pakighinabi sa mga tigbalita kagahapon mitambag ni Gamboa nga atimanon na lang ang iyang anak ug hatagan og maayong sumbanan.

Kabahin sa P100 mil nga premyo nga ihatag sa siyudad ngadto sa makatudlo sa suspetsado posibleng magtagbo ang mayor, konseho ug ang kapolisan kabahin niini. (FREEMAN)