Tulo nadakpan sa buybust sa PDEA

CEBU, Philippines - Nasikop ang gipasanginlang level 2 drug pusher ug ang iyang kapuyo ug usa pa ka kauban atol sa buybust operation sa Philippine Drug Enforcement Agency (PDEA) Central Visayas sa sitio Looc sa barangay Maribago sa dakbayan sa Lapulapu kagahapon sa alas-2 sa kaadlawon.

Ang nasikop mao si Salvador Alquizalas, 59, alyas ‘Buddy’ nagpuyo sa maong lugar apan lumad nga taga Barili ug ang iyang kapuyo nga si Marcelina dela Rosa, alyas ‘Mercy’ ug laing usa nga si Johnpaul Hilopo, 21.

Si Jessie Tabanao, tigpamaba sa PDEA nga nahinabi sa Banat News nagkanayon nga ang target sa buybust mao si Alquizalas ug ilahang gipalitan og duha ka putos nga shabu sa nagkantidad nga P300 matag usa.

Matud ni Tabanao nga sa dihang gitunol ni Alquizalas ang shabu ila dayun kining gidakop uban ang kapuyo niining si dela Rosa ug sa dihang ilang girekisa nakuhaan kini og napulo pa ka paketeng gidudahang shabu. Ila usab gisikop si Hilopo sanglit didto atol sa maong transaksyon.

Matud ni Tabanao dunay pending nga kaso sa korte si Alquizalas duha ka tuig na ang nakalabay sa susama gihapong kalapasan apan nakapiyansa. (FREEMAN)