Gillamac: Motorista magmatngon vs karnaper

CEBU, Philippines - Mipasidaan ang hepe sa kapolisan sa dakbayan sa Mandaue sa mga motoristang nanag-iya og mga motorsiklo nga dili mokumpiyansa tungod sa presensya sa mga kawatan og motorsiklong mobaligya niini human ma-chopchop ang gikawat nga motor.

Dungan sa maong pasidaan ang mga tawong mamalit niining mga kinawat nga motorsiklo ug mga piyesang wala nila masayri kung asa kuhaa sa mga tawong mamaligya niini tungod kay posibleng kini gikan sa mga kinawat nga motorsiklo.

Niadtong milabay’ng gabii usa ka Honda XRM nga motorsiklo nga gibilin diha sa parkingan sa usa ka department store sa Ibabao Estancia, dakbayan sa Mandaue ang gikawat sa wala mailhing mga tawo. Igo nalang sa pagsumbong ang tag-iyang si Sonny Amadeo, nga taga dakbayan sa Lapulapu kinsa may gipalit og kadiyot diha sa maong tindahan apan sa iyang pagbalik wala na diha ang iyang motorsiklo.

Si Senior Superintendent Noel Gillamac, direktor sa Mandaue City Police Office (MCPO) miingon nga tulo ka grupo sa mga karnaper og motorsiklo ang ilang gipanid-an karon nga ang modus operandi mao ang pagpangawat sa mga i-parking nga mga motorsiklo.

Matud pa niya nga nailhan na nila ang maong grupo ug padayon na nilang gipanid-an ang mga kalihokan niini ug gipaabot na lang nila ang tukmang panahon alang sa hingpit nga pagpuhag niini.