Frat war mikalas og usa

CEBU, Philippines - Patay ang usa ka batan-ong lalaki nga gipusil sa wala hiilhing duha ka lalaki nga nagsakay og motorsiklo alas-4 pasado ang takna sa miaging kaadlawon sa sitio Orel, barangay Banilad, dakbayan sa Mandaue.

Ang namatay mao si Mark Josephus Sentena, 21, nagpuyo sa maong dapit ug ang nagpusil mao ang duha ka wala hiilhing mga lalaki nga kasarangan lang ang gidak-on sa panglawas ug mga pamarog niini.

Si SPO2 Genaro Lambayan sa kapolisan sa Presinto 4 sa Casuntingan Police Station sa Mandaue City Police Office (MCPO) nga nahinabi sa Banat News miingon nga kuyog sa biktima ang iyang mga barkada nga naglakaw pauli sa ilang panimalay.

Sa ilang paghidangat sa atubangan sa usa ka motel sa maong dapit kalit lang milabay ang motorsiklo nga kolor itom nga giluwanan usab sa duha ka wala hiilhing lalaki.

Matud pa ni Lambayan nga gisaylohan na unta ang biktima ug iyang mga barkada apan kalit mibalik ang motorsiklo ug ang nag-angkas miibot og armas dayong pusil sa kalawasan sa biktima nga maoy hinungdan sa pagkaigo niini sa dughan.

Si Lambayan miingon nga dihang nakapahilayo na sa maong dapit ang motorsiklo daling gitabang sa mga barkada ang biktima ug gihatud sa Cebu Doctors Hospital alang sa dali nga pagpatambal apan sa paglabay sa pipila ka oras namatay kini.

Sumala pa sa mga dili pa kompirmadong report sakop sa Alpha Kappa Rho fraternity ang biktima ug nagtoo ang kapolisan nga personal nga panagbangi ang hinungdan sa maong hitabo o ba kaha sakop sa laing fraternity ang mihimo sa maong krimen.

Kagahapon sa hapon pipila ka mga batan-on nga nalambigit sa fraternity ang gipik-ap sa kapolisan alang sa pagpakita ngadto sa kauban sa biktima apan wala pay positibong gitumbok kanila nga maoy mipusil patay ni Sentena. – EIM (BANAT NEWS)