Nadakpang garbage truck di sa gobiyerno

CEBU, Philippines - Gipanghimakak sa kagamhanan sa dakbayan sa Mandaue ang taho nga may duha kini ka trak sa basura nga nadakpan didto sa dakbayan sa Danao nga milabay og basura didto sa maong lugar.

Si Roger Paller, tigpamaba sa buhatan sa mayor sa Mandaue nagkanayon nga gipasuta ni Mayor Jonas Cortes kung kinsay tinubdan sa maong balita nga napatik sa Banat News sa gula niini kagahapon.

Hinuon matud pa ni Paller nga ang mga trak nga nadakpan iya kini sa pribadong kompaniya nga nailhang Cebu Solid Waste Company, kansang trabaho mao ang pagpangolekta og basura nga magpabayad sa mga tag-iya sa basura nga walay pagtugot sa kagamhanan sa Mandaue.

Matud pa ni Paller nga kining mga traka kaniadto adto maglabayan sa ilang mga basura sa usa ka pribadong lote sa barangay Umapad, dakbayan sa Mandaue.

Apan gumikan kay nabantayan sa mga sakop sa Garbage Enforcement Team, giatangan kining mga traka didto apan wala hidakpi kay misirit ug mipahilayo ug didto ilabay ang ilang basura sa barangay Guinacot, dakbayan sa Danao niadtong Lunes sa gabii. Ang mga drayber sa maong mga trak nga gisikop sa kapolisan sa Danao mao sila si Jojo Teopiz Alinsunod, 29, ug Ernesto Paraiso, 42, pulos taga Umapad, Mandaue.

Lakip nga nasikop sa kapolisan mao ang lima ka mga helper ug silang tanan gipakagulkol sa prisohan sa kapolisan samtang ang ilang mga trak gipugngan sa kapolisan sa maong dakbayan ug gihikay dayon ang kasong gisang-at batok kanila.

Ang balaod nga Republic Act 9003 nagbatbat nga usa ka paglapas sa balaod nga labayan og basura ang mga pribadong luna nga walay pagtugot sa kagamhanan.  - BANAT NEWS