Operation Kilom-kilom ipadayon

CEBU, Philippines - Gipadayag ni manlalaban Rafael Christopher Yap, hepe sa Cebu City Traffic Operations Management (CITOM) nga padayon nilang gipatuman ang “Operation Kilom-kilom” kay ilang namatud-an ang ka-epektibo niini.

Ang maong operasyon nga ipahigayon sa panahon sa kagabhion maoy nag-edukar sa mga drayber sa hustong pagsunod ug pagtuman sa mga balaod sa trapiko sumala kang Yap.

Nagkanayon si Yap nga pinaagi sa Operation Kilom-kilom mabadlong ang mga drayber nga magpabadlong panahon sa kagabhion   kay dali ang disgrasya kun dili sila mapitol. Matud pa ni Yap nga nag-agi og daghang training ang tanang traffic enforcer sa siyudad sa Sugbo ug gibantayan usab kanunay ang ilang pagtuman sa katungdanan pinaagi sa gitawag nga performance evaluation.

Sa record nga nakuha sa Banat News sa Human Resources Development Office sa City Hall , adunay unom ka personnel sa CITOM nga wala na ma-renew   ang kontrato gumikan sa kaluya niini og performance. Samtang gihikay na karon sa CITOM ang gipangayo nilang sakyanan gikan sa City Hall aron maoy magsilbi nila nga “mobile headquarter”   sa mga hot spot area nga paradahan nila niini.

Ang pilot area nga duawon sa mobile headquarter mao ang Salinas Drive diin adunay giingong mga drayber sa habal-habal nga manghulga sa mga enforcer nga magpahigayon og operasyon.  - BANAT NEWS