Magtutudlo 'gilisud-lisod' mireklamo

CEBU, Philippines - Duha ka magtutudlo sa Talisay City Central School (TCCS) gitakda kagahapong mopasaka og kasong oppression o paglisud-lisod batok sa ilang prinsipal.

Ang nahisgutang mga magtutudlo mao si Judalyn Lopernes, 35, taga barangay Dumlog, nagtudlo sa pre-school sulod na sa pito ka tuig ug si Ian Albarando taga barangay Biasong, pulos sa dakbayan sa Talisay, usa ka Teacher Aid Volunteer (TAV).

Ang duha mipasangil nga natahap sila nga may labot sa ilang pagpabor sa ilang  kanhi prinsipal sa TCCS nga si Maria Lourdes Ipong ang hinungdan nga gilisud-lisod sila karon.

Matud niya nakugang siya dihang wala siya patrabahoa niadtong Martes ug giwagtang na ang iyang ngalan sa biometric sa rason nga wala kuno siya’y contract of service.

Apan dihang iyang gitunol ngadto kang Caparida ang iyang contract of service wala kini dawata ug wala pirmahe sa maong prinsipal ug giingnan lang siya nga adto siya makig-istorya kang Talisay City Division Superintendent Woodrow Denuyo.

Matud ni Lopernes nga gisuwatan niya si Denuyo niadtong Abril 13, 2011 kay nangutana siya sa status sa iyang application isip Teacher I.

Niadtong Abril 20, 2011 nadawat niya ang tubag ni Denuyo nga nagkanayon nga dili pa niya ika-eksplikar ang hinungdan nga dili kahatagan og aksyon ang iyang aplikasyon.

Apan dihang gimandoan si Denuyo sa ilang regional office nga pa-eksplikahon ngadto kaniya (Lopernes) bahin sa status sa iyang aplikasyon, giingong mihiwasa si Denuyo sa kasuko ug didto iyag-yag ang maong kapungot atol sa Teachers General Assembly niadtong Hunyo 3, 2011.

Si Denuyo giingong nagbagutbot nga nagkanayon “ganahan ba ka mo-hire og maestra nga mangutana sa imong kapasidad?”.

Si Albarando sa iyang bahin, nagkanayon nga nadawat siya isip TAV niadtong Hulyo 2010 dihang si Ipong mao pay prinsipal sa TCCS ug nagdawat siya og sweldo nga P7,500 gikan sa siyudad tungod kay ang siyudad man maoy mi-hire nila.

Matud niya nga gikan sa Grade IV gibalhin siya sa pagpatudlo ngadto sa Grade II ug niadtong Lunes wala na usab ang iyang ngalan sa biometric tungod kay pabalhinon siya ngadto sa Tanke Elementary School.

Matud ni Denuyo nga gusto lang niyang ibuwag ang maong magtutudlo ug ang prinsipal aron pareho silang malikay sa kagubot tungod kay duna na silay mga komplikasyon.

Si Denuyo midugang nga andam siya sa tanang higayon moatubang sa imbistigasyon kun mosumbong ang duha ka magtutudlo ngadto sa ilang labaw.  - BANAT NEWS