Sakyanang pinayuhot sakmit

CEBU, Philippines - Giablihan ni Cebu Customs District Collector Ronnie Silvestre uban sa mga sakop sa media sa kaulohan ang usa ka container van nga gisudlan og   unom ka sakyanan nga gipayuhot gikan sa Korea.

 Pipila sa mga kauban ni Silvestre mao sila si Nap Sanota ang Presidente sa Customs Media Association o CMA sa kaulohan ug mga kaubanan niini kinsa personal nga misusi sa usa ka 40- footer van nga gikargahan sa gipalusot nga mga sakyanang gi-chop-chop.

Matud pa ni Silvestre nga ang maong kargamento miabot niadtong Hunyo 15 ning tuiga diin ang consignee niini mao ang Aya Day Trading nga walay address nga nahimutang sa dukomento.

Ang maong mga sakyanan gipadala sa usa ka Amor Trading nga nagbase sa Byeokje-Dong, Deogyang-gu.

Samtang si ESS Customs Police Commander Capt. Isidro Estrera nagkanayon nga base sa ilang imbestigasyon nasuta nga human madiskobre sa mga otoridad sa customs police nga wala mo-file og entry ang tag-iya sa maong container van hinungdan nga ila kining gipaalerto ug girekomendar ngadto kang Silvestre sa pagluwat og Warrant of Seizure and Detention o WSD.

Ang mga sakyanan nga giputol-putol na sulod sa maong van mao ang Kia Spectra, HD Graduer, DW Matiz, HD EF Sonata 1999 ug duha ka HD EF Sonata 2000 nga pulos mga Korean car.

Gibanabana ni Silvestre nga mokabat sa P3 milyones ngadto sa P5 milyones ang katibuk-ang kantidad sa maong sakyanan. Ang maong kargamento nakalapas sa Tarrif and Customs Code of the Philippines gumikan sa kakuwang sa import permit niini.   - BANAT NEWS