Cebuano News: Kolektor sa bangko gitulis, gipatay

CEBU, Philippines - Gipusil ug namatay ang usa ka kolektor sa bangko nga giatngan sa katubhan gikan nangolekta sa mga utangan sakay sa iyang motorsiklo sa miaging alas-3 pasado sa kahaponon sa sitio Martinez sa barangay Caputatan Norte sa lungsod sa Medellin.

Gituohan sa kapulisan nga tulis ang motibo sa pagpusil patay sa biktimang si Dexter Canales, 29, taga barangay Agujo sa lungsod sa Daanbantayan ug collector sa Fairbank Daanbantayan Branch.

Si Canales naabtan sa kapulisan nga naghigda sa punoan sa mangga sa tunga-tunga sa katubhan sa maong lugar ug dunay samad pinusilan sa iyang kalawasan.

Si PO3 Archimedes Villapes sa Medellin Police station nga nahinabi sa Banat News pinaagi sa telepono miingon nga giatangan sa katubhan ang biktima sa tulo ka wala hiilhing armadong tawo nga nagtaptap og senina sa ilang nawong ug gipusil si Canales.

Sumala pa ni Villapes nga usa sa ilang gitutokang anggulo nga tulis ang motibo sa pagpamusil sanglit ang biktima gikan naningil sa mga utangan sa maong lugar ug katapusan niya nga gipaninglan si Kapitan Agnes Yaon diha sa barangay hall.

Ang kapitan maoy unang nakadungog og buto-buto sa armas kay dili halayo sa barangay hall ang gigikanan niini. Sa pagduda sa kapitan, daling gitawagan si Canales sa iyang cellphone ug nangutana kun asa man ka ‘ron? ug daling mitubag si Canales sa kapitan, “gitulis ko kap, nya gipusil ko dia ko sa kamanggahan nipasalipod,” matud pang Villapes nga nikutlo sa gisulti sa kapitan kinsa daling mipahibawo kanila.

Daling miresponde ang kapulisan pinangulohan ni Insp. Manuel Singson nga nagdala nang daan og ambulansya.

Matud ni Villapes sa pag-abot nila sa crime scene wala dayun nila makit-i ang biktima ug didto nila   makit-i nga naghigda na sa punoan sa mangga sa tunga-tunga sa katubhan nga gibana-banang 75 metros sa distansya gikan sa karsada nga dunay samad pinusilan sa dughan ug walang kilid.

Dali nilang gikarga sa ambulansya si Canales ug gidali paghatud sa Severo Verallo Memorial District Hospital sa dakbayan sa Bogo apan gideklarar sa doktor nga patay na ang biktima.

Gituohan nga revolver ang gigamit pagpusil sa tulisan sanglit walay narekober nga kabhang sa bala ang kapulisan sa crime scene gawas lang sa cellphone ug sapatos nga gihigdaan sa biktima apan ang iyang bag nga gisudlan sa kuwarta wala na makit-i.

Matud ni Villapes dili pa nila matino kun pila ang nadala sa tulo ka tulisan apan base sa bana-bana sa mga residente sa dapit dili mominus P10 mil ang nakolekta sa biktima diha lang sa Caputatan wala pay labot sa ubang lugar.

Duha ka tawo nga ‘nagsurko’ sa katubhan mitug-an sa kapulisan nga may nakit-an silang tulo ka tawo nga naghupo-hupo sa katubhan nga daw dunay gipaabot.

Laing duha ka tawo nga saksi ang mitug-an nga ila gyud nakit-an nga migawas gikan sa katubhan ang usa sa tulo ka lalaki ug gipusil makadaghang higayon ang biktima hinungdan nga nalamba ang motorsiklo niini. 

Ang biktima midagan paingon sa katubhan samtang ang laing duha nga kauban maoy look-out nga naghupo sa katubhan. Ilang ipatawag og balik ang mga saksi aron makuhaan nila og dugang kasayuran ug makahatag og description sa mga suspetsado.

Nagtuo si Villapes nga taga didto ra sa maong lugar o kaha sa kasikbit nga barangay sanglit nagtaptap man sa ilang nawong aron dili mailhan.

Si Warren Buena, kawani sa Fairbank Bogo Branch nga nahinabi sa Banat News miingon nga naghuwat pa sila sa ilang head office nga moisyu og statement.  – EIM (BANAT NEWS)