58 ka armas gipaningil sa CH

CEBU, Philippines - Mokabat sa 58 ka mga service firearm nga giluwat sa City Hall ngadto sa kapolisan   ug sibilyan ang padayong gipaningil karon sa kagamhanan sa dakbayan sa Sugbo gikan sa mga nakadawat niini.

 Base sa dokumento nga giandam sa General Services Office (GSO) sa City Hall , 12 pa lang ang nauli kanila karon kay kasagaran sa mga polis nga gipakupot nila niini nadestio na sa laing rehiyon, samtang 8 ang nangawala ug gipangayoan og affidavit of loss ang nakawagtang niini aron pabayron sa tinarong nga pagbayad sa maong mga armas.

Ang hepe sa GSO nga si Engr. Rolando Ardosa nagkanayon nga modangop na sila sunod buwan sa City Legal Office aron mahimoan og rekomendasyon kadtong mga hingtungdang naghupot sa maong mga butang nga napakyas sa pag-uli niini .

Samtang sa mga sibilyan nga opisyal, si kanhi Mayor Alvin Garcia, natumbok usab nga wala pa makauli sa iyang service firearm. Ang ubang mga polis nga wala makauli usab sa ilang armas mao ang kadtong nadestino sa laing dapit sama sa Lapulapu City Police Office, Police Regional Office -7, Mandaue City Police Office, Bohol Provincial Police Office ug uban pa. (BANAT NEWS)