CEBU, Philippines - Gisugdan na sa Kapitolyo ang pagpangandam sa ika-442 ka tuig nga anibersaryo sa probinsya sa Sugbo karong bulan sa Agosto.
Matud ni Provincial Administrator Eduardo T. Habin, nga sobra sa napulo ka komitiba ang gitukod aron moatiman sa mga kalihokan sa sunod buwan.
Dugang pa niya nga sa unang adlaw pa lang sa bulan sa Agosto, adunay usa ka flag raising ceremony ang ipahigayon sa Kapitolyo diin gipaabot nga musalmot ang mga mayor gikan sa mga nagka- lain laing mga lungsod sa tibuok probinsya ug mga local government unit sa mga kalungsoran.
Nunot niini gipahibawo ni Habin nga sama sa naandan aduna gihapoy trade fair nga pagaablihan sa Kapitolyo samtang ilusad usab ang E-Gwen sa sunod nga buwan alang sa maong anibersaryo.
Sa samang higayon ang presidente sa Provincial Employees Association of Cebu (PEACE) nga si Ma. Junelene Arenas, mitug-an sa Sugbo TV News Team nga daghan gayud kaayong ipasundayag ang Kapitolyo nga pagasalmotan mismo sa mga kawani sa Kapitolyo sama sa fun walk, fashion show ug uban pa. (BANAT NEWS)