Lagda sa mipetisyon vs Mayor Durano gi-review

CEBU, Philippines - Gisugdan na sa Commission on Elections (COMELEC) ang pag-review sa 31 mil ka mga pirma kon lagda sa mga tawong giingong namirma sa recall petition batok ni Danao City Mayor Ramon ‘Boy’ Durano Jr. nga gisang-at sa iyang igsuong si Bise Mayor Ramon “Nito” Durano ug mga kaalyado niining sakop sa konseho.

Gibutyag ni Comelec Provincial Supervisor Atty. Lionel Marco Castillano dihang nahinabi sa Banat News gihatagan lang sila og napulo ka adlaw alang sa pagpahigayon sa review sa mga lagda.

Kini aron pagtino kun tinuoray bang mga rehistradong botante sa maong siyudad ang namirma sa pagpa-recall sa mayor.

Sugod kagahapong adlawa gisugdan dayon ni Castillano ang pag-review sa mga pirma ug mipasalig nga ilaha kining mahuman sulod sa adlaw nga gitagal.

Matud ni Castillano nga human sa maong tagal iduso na nila didto sa ilang ulohang buhatan sa Comelec-Manila ang maong mga dokumento kinsa mopahigayon usab og subling pakisusi sa mga lagda ug pagkahuman maoy mopakanaug sa desisyon kun dawaton ba ang maong recall petition.

Hinuon giklaro niya nga bugtong ang posisyon lang sa pagkamayor subling ibalik og eleksyon kun maaprobahan ang maong recall petition ug way labot ang ubang posisyon.

Si Bise Mayor Durano ug mga sakop sa konseho inabagan sa iyang anak nga si Kongresista Red Durano sa kinto distrito maoy nangusog pagpa-recall sa mayor tungod sa loss of confidence tungod sa alegasyong pagpabaya niini sa batakang serbisyo sa lungsod. (BANAT NEWS)