CEBU, Philippines - Wala nay sapot nga mitaho sa kapolisan ang usa ka 18-anyos nga babayeng nagtrabaho sa usa ka call center human kini gitulis ug pagkahuman gilugos sa duha ka mga lalaki diha sa barangay Paknaan sa dakbayan sa Mandaue kagahapon sa kaadlawon.
Ang biktima mao si Jessa (tinuod pangalan gitago) 18-anyos, dalaga ug residente sa usa ka compound sa samang barangay naghilak ug wala nay sapot gawas lang sa coat nga gisuot ug midangop sa Presinto 3 sa kapolisan sa dakbayan sa Mandaue ug misumbong sa iyang gidangatan.
Base sa asoy ni Jessa, ala 1:25 kagahapon sa kaadlawon padulong na siyang mouli gikan sa trabaho dihang pag-abot sa dalan Alinsug sa maong barangay duha ka mga lalaki ang kalit mition kaniya og kutsilyo.
Matud pa ni PO2 Pearl Ann Flores sa Women’s Desk sa Presinto 3 nga kusog kaayo ang pagbunok sa uwan nianang tungora ug pagtungod niini sa parkingan sa mga traysikol kalit siyang giduol sa mga rapists ug gipangutana kung unsa nang orasa.Diha-diha kalit siyang gipugngan ug gitionan og kutsilyo ug gidala sa ngitngit nga dapit ug pugsanong gipahigda sa usa ka lamesa ug gibanos-banosan og lugos sa duha.
Human niini gikuha sa mga rapists ang iyang bag nga adunay sulod nga cell phone ug kwarta. Wala pa gyud matagbaw ang mga kriminal gidala hasta ang pantalon sa dalaga.
Wala na diha sa nahitaboan ang mga rapists sa pagresponde sa kapolisan apan nagtuo sila karon nga residente ra sa maong lugar ang maong mga batan-on ug gitiman-an na ang kalihukan sa biktima.
Ang biktima gidala sa usa ka tambalanan alang sa paghiling samtang gisubay na karon sa kapolisan ang maong mga rapists. (BANAT NEWS)