Katungod sa mga katabang patas-an

CEBU, Philippines - Giawhag sa Trade Union Congress Party (TUCP) ang Senado nga i-ratify ang International Labour Organization Convention on Domestic Workers nga gi-adopt sa gobiyerno, mga mamumuo ug delegado sa mga kapitalista niadtong Hunyo 16, 2011 sa mga ILO-member nga mga nasud.

Sumala pa ni TUCP Rep. Raymund Democrito Mendoza kinsa bag-ohay pang mitambong sa convention sa ILO Annual Conference sa Geneva, Switzerland panahon na aron palambuon ang kahimtang sa pamuo sa gibana-banang 53 milyones nga mga trabahante sa tibuok kalibutan nga gilangkuban sa minilyong mga Overseas Filipino Workers.

Matud pa niini nga dinhi palang sa Pilipinas, aduna nay 2.5 milyones ka mga katabang nga nanarbaho sa mga panimalay. Sumala pa niya dili angayang igsapayan ang mga katabang tungod kay dako sila og kontribusyon sa ekonomiya ug aduna silay katungod nga makaangkon og mas arang-arang nga kabutang.

Sumala pa sa TUCP, ang mga nasud nga mo-ratify sa bag-ong ILO mohatag og kasigurohan sa tanang mga domestic workers sa tibuok kalibutan nga makaangkon og batakang katungod sa usa ka mamumuo nga natagamtaman sa ubang mga trabahante.

Kini sama sa hustong gidugayon sa oras sa ilang pagtrabaho, 24-oras nga pahuway sa usa ka semana kun day-off, limitasyon sa bayad nga sinina ug pagkaon (in kinds nga sweldo), klarong impormasyon ug kasabutan sa ilang pagtrabaho, pagrespeto sa ilang mga prinsipyo ug katungod nga magpasakop sa usa ka asosasyon ug ang katungod sa collective bargaining agreement.

Si Mendoza daan nang misang-at og balaudnon ngadto sa Ubos Balay Balauranan nga House Bill No.4277 kon Magna Carta for Domestic Workers 2011 nga ang katuyoan mao ang paghatag og hustong benepisyo, katungod ug maayong kahimtang alang sa mga nagtrabaho isip katabang.

Gihulagway ni Mendoza nga bisan paman sa gidaghanon sa maong sektor sa pamuo sila maoy kanunay’ng naabusohan tungod usab sa kalugak sa kasamtangang balaod nga unta nanalipod kanila nga kinahanglan nang bag-uhon.

Ang maong balaudnon kung mapasar ug mahingpit nga balaod magbutang sa Pilipinas nga usa sa mga nasud nga dunay seryusong proteksyon sa katungod sa mga katabang.

Dihang gipatuman ang Magna Carta for the Kasambahay, gimando gyud nga kinahanglang adunay kasabutan o kontrata tali sa katabang ug sa ilang agalon nga gisuwat sa pinulongang masabtan sa duha ka habig.

Gimando nga kinahanglang dili moubos sa P2,500 ang ilang suhulan ug kinahanglang swelduhan sila matag kinsenas ug kinahanglang aduna gyud silay pay slip nga nagtala sa adlaw sa ilang trabaho.

Lakip sa nalatid sa Magna Carta mao nga kinahanglan kun usa ka tuig na ang katabang sa iyang trabaho aduna kini lima ka adlaw nga bakasyon, dili molapas sa 10 ka oras, kinahanglang aduna silay walo ka oras nga pahuway nga wala manugo, kung sila duha ka tuig na sa serbisyo kinahanglang hatagan sila og maternity leave ug pito ka adlaw nga paternity leave sa mga houseboy nga adunay sweldo.

Kinahanglan usab silang masakop sa Social Security System (SSS) ug Philippine Health Insurance (Philhealth). Gidili na usab ang pagkuha og katabang nga ubos sa 15-anyos, ang makalapas niini mahimong makiha og illegal recruitment, force labor, debt bondage ug human trafficking.

“All the basic rights and benefits must be also given to our domestic workers as we must totally eliminate discrimination in our society,” matud pang Mendoza.  (BANAT NEWS)