Joavan nakadakop na sab

CEBU, Philippines - Usa ka trak de karga nga kargado sa bas ug graba nga kinubkob gikan sa sapa sa Mananga, gisikop na usab sa sakop sa Vanguard nga si Joavan Fernandez, didto sa barangay Lagtang sa miaging Sabado sa hapon.

Ang nasikop mao ang usa ka Fuso Forward truck nga nagtangag sa plakang YCD-184 nga kargado sa lima ka cubic meter (cbm) nga bas ug graba.

Ang maong trak maoy ikatulong nasikop ni Joavan sa duha na ka higayon niyang maigmatong pagbantay sa mga kawatan og bas ug graba sa sapa sa Mananga.

Ang maong trak gimaneho ni Pablito Baculi Cagayan, 56, nga taga Camp 4, sa maong dakbayan.

Gikustodiya na kini karon sa kapolisan sa Talisay samtang gipaabot ang kaso nga isang-at   batok sa drayber ug sa tag-iya sa maong sakyanan nga si Helen Silva Troya, nga taga Camp 3 sa maong dakbayan.

Kini sa dihang napakyas si Cagayan pagpakita og mga papeles nga tinarong ang ilang pagpanguha og bas ug graba gikan sa sapa sa Mananga.  

Ang bas ug graba sa Mananga daan nang gibalaod sa Department of Environment and Natural Resources (DENR) nga dili pahilabtan aron dili makankan pag-ayo ang maong sapa nga labing maghatag peligro sa dagkong lunop nga mahitabo sa mga lugar sa Talisay.

Gilauman sa kapolisan ug sa molupyo sa Talisay nga mokalma na ang kinawatay sa bas ug graba sa sapa sa Mananga karong molihok na si Joavan, ang giila karong Super Hero sa Talisay.  (BANAT NEWS)