Banda sa polis sa Mandaue

CEBU, Philippines - Ang pagpabati sa mga maanindot nga huni nga ipatugtog sa mga sakop sa Mandaue City Police Office (MCPO) band maoy usa sa bag-ong paagi nga gisagop karon sa kapolisan sa Mandaue sa ilang pagpatunhay sa kahapsay ug kalinaw.

Si Sr. Supt. Noel Gillamac, director sa MCPO nga nahinabi sa Banat News mibutyag nga ilang nahukman ang pagmugna sa MCPO band kay namatikdan niya nga may mga sakop siyang polis nga kaantigo manganta ug maayo usab og tingog nga sakar kaayo sa binag-o ug bisan sa kinaraang tugtog sa musika.

Matud pa ni Gillamac nga gawas nga may maayong manganta, may mga polis usab sa MCPO nga hanas mo-piano, guitara, baho nga maoy nakaaghat kaniya sa pagmugna og ilang kaugalingong MCPO band.

Dinhi ning maong grupo, ikapabulhot sa   maong mga polis ang ilang hiantigohan sa natad sa musika, dugang sa ilang kahanas ug kabatid sa paggamit sa ilang armas de fuego ug sa trabahong pamolis.

Nagtuo si Sr. Supt. Gillamac nga ang pagpabati sa mga maanindot nga mga awit sa MCPO Band usa usab sa mga paagi nga mahiduol sila sa katawhan.

Gitataw ni Gillamac nga ang iyang tinguha sa pagtukod ning MCPO band mao ikapasabot niya ngadto sa katawhan nga silang mga polis dili lamang hanas sa paggukod sa mga kriminal kundi kaantigo usab sila molingaw sa publiko pinaagi sa musika.

Si Chief Inspector Oscar Monteroyo nga maoy administration chief sa MCPO mitug-an usab sa Banat News nga gikan unom ka presinto sa kapolisan sa Mandaue ang mga polis nga ilang gihimong sakop sa banda nga pulos hanas sa pagkanta ug pagpatugtog sa nagkadaiyang matang nga mga instrumento sa musika. (WC) (BANAT NEWS)