Balang miuntol nakaangol

CEBU, Philippines - Naangol ang usa ka tawo nga naigo sa miuntol nga bala didto sa eskina sa mga dalang Datag ug Cansubing sa barangay Buagsong, lungsod sa Cordova sa miaging gabii.

Ang biktima mao si Elmer Rosane, 32, minyo nga nagpuyo sa maong dapit, samtang ang tag-iya sa saag nga bala mao si Ruel Magaway, 40 anyos, ulitawo, nga taga barangay Bangbang sa nahisgotang lungsod.

Si SPO1 Laurencio Wagwag sa kapolisan sa maong lungsod nga nahinabi sa Banat News miingon nga nakig-inom ang biktima sa iyang higala nga si Roger Tampus nga giingong maoy gikabingkil ni Magaway sa nangaging mga adlaw.

Dugang pa niya nga ang suspetsado nga nagsakay sa iyang motorsiklo nahiagi sa dapit nga giinoman sa biktima ug sa amigo niining kontra sa suspetsado.

Matud pa ni SPO1 Wagwag nga mihunong ang suspetado ug sa pagkanaog niini sa iyang sakyanan iya dayong gitirohan sa iyang .38 kalibre nga revolver si Tampus.

Apan matud pa ni Wagwag nga abtik kaayong nakalayat ug nakadagan si Tampus hinungdan nga wala kini maigo apan ang bala didto motugpa sa semento sa dapit sa gilingkoran ni Tampus.

Ang biktima nga naglingkod atbang ni Tampus, maoy nasabak sa bala nga miuntol gikan sa sementong natugpahan niini.

Samdan kini sa tiyan ug daling gihatod ngadto sa Lapulapu District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.  (BANAT NEWS)