Madridejos gitabangan ni Gwen

CEBU, Philippines - Kapin sa P3.2 milyones ang gibubo nga salapi ni Gobernador Gwendolyn Garcia isip financial assistance ug mga proyektong infrastraktura   sa lungsod sa Madridejos lakip na ang tulo ka barangay niini.

Ang mga proyekto nga gihatag sa gobernador sa maong lungsod gilangkuban   sa duha ka classroom nga school building nga mobalor og   P750 mil ug mga computer.

Gawas niini   ang gobernador nang-apod-apod usab og mga school supply ngadto sa mga tinun-an sa Mancilang Primary School.

Atol sa hamubo nga programa, personal nga gihatag ni Gobernador Garcia ang tseke nga mobalor sa usa ka milyon ka pesos ngadto kang Madridejos Mayor Salvador dela Fuente isip hinabang alang sa road concreting project sa nahisgutang lungsod.

Laing kantidad nga gitunol sa gobernadora mao ang P740 mil alang sa duha ka lawak saringan nga edipisyo sa San Agustine National High School, laing P730 mil alang gihapon sa 2 classroom school building sa Tabagak Elementary School.

Sa pagduaw sa gobernadora sa Madridejos gisubhan usab niya uban ni 4th district Congressman Benhur Salimbangon ang road concreting project sa barangay Baod ug ang bag-ong natukod nga multi purpose building sa maong barangay uban usab sa hinabang sa gobernador.

Si Mayor dela Fuente nagpasalamat pag-ayo kang Gobernador   Garcia gumikan sa mga mihoras nga gihatag sa probinsiya ingon man ni Congressman Salimbangon alang sa kauswagan sa panginahanglan sa mga molupyo sa lungsod sa Madridejos ug ubang mga lungsod sa kwarto distrito.  (BANAT NEWS)