Notadong 'pusher' nalutsa'g warrant sikop

CEBU, Philippines - Nadakpan sa kapulisan ang gitumbok nga notadong tigpayuhot og gidiling drugas pinasikad sa warrant of arrest gikan sa korte sa dakbayan sa Danao.

Ang nadakpan sa kapulisan human gi-serve ang warrant of arrest niadtong Biyernes sa alas 5:00 sa hapon sa barangay Poblacion mao si Lourdy Villacarillo, 29, molupyo sa P.J. Almendras St., sa dakbayan sa Danao.

Matud ni SPO4 Edgar Gomez sa Danao City Police Station dihang nahinabi sa Banat News gikan ni Regional Trial court RTC Judge branch 25 Silvia Aguirre Paderangga ang maong warrant of arrest tungod sa pagpayuhot og ginadiling drugas.

Human makadawat og inpormasiyon ang kapulisan sa presensiya ni Villacarillo diha sa balay niini niadtong higayuna dali nila kining gi-serve ug atrasawo na ang subject dihang nakabantay kini nga dunay mga polis tungod kay naliyukan na niini ang palibot ug wa na kini nahimo gawas sa pagtahan sa iyang kaugalingon.

Ang kapulisan mihulagway nga taud-taod nang gipanid-an ang kalihukan sa suspek tungod sa mga report nga nagpayuhot kini og ginadiling drugas sa maong lugar.  (BANAT NEWS)