Breastfeeding program ok sa mga negosyante

CEBU, Philippines - Gidasig sa buhatan sa National Nutrition Council- 7 ang mga inahan sa dakbayan sa Mandaue ug rehiyon nga magpasuso gyud sa ilang mga anak alang sa kahimsog ug maayong panglawas sa mga bata.

Gipaluyohan usab sa lokal nga kagamhanan ug mga magpapatigayon sa maong dakbayan ang maong tinguha hinungdan sa naumol nga kasabutan niadtong miaging adlaw.

Ang memorandum of agreement nga ilang gipirmahan maoy pagpakita sa ilang pagsanong sa paggahin og lugar o lawak sa ilang mga establisamento aron maoy dapit diin mahimong makapatutoy ang mga kawaning adunay mga masuso nga makapatutoy kanila.

Gihangop usab sa presidente sa Mandaue Chamber of Commerce and Industry nga si Eric Mendoza ang maong lakang.

Mipadayag usab sa iyang pagsuporta sa maong programa si Mayor Jonas Cortes nga nagrepresentar sa kagamhanan sa dakbayan kinsa miingon nga iyang hatagan og lugar ang kawani nga mga babaye nga adunay anak alang sa pagpatotoy niini.

Ang assistant health secretary nga si Maria Flores nga maoy nagrepresentar sa habig sa nasudnong kagamhanan mipadayag nga ilang gidasig ang mga inahan sa pagpatotoy tungod kay ilang nakita nga kini ang labing maayo nga pamaagi nga masiguro ang kahimsog ug maayong panglawas sa ilang mga anak.

Gitataw niya nga ang paghimo og kasabutan sa kagamhanan sa Mandaue ug sa mga magpapatigayon sa hugtanong pagpatuman sa breastfeeding program maoy labing unang gihimo sa usa ka lokal nga kagamhanan dinhi sa rehiyon. (EIM) (BANAT NEWS)

Show comments