Kawata'g bas gisikop ni Joavan

CEBU, Philippines - Duha ka trak de karga nga kargado sa bas nga kinubkob gikan sa sapa sa Mananga gisikop sa sakop sa Vanguard nga si Joavan Fernandez, didto sa barangay Lagtang sa maong dakbayan sa miaging Biyernes sa hapon.

Kini human luwasa ni Fernandez kinsa ilado kaayo sa iyang ngalang Joavan, ang usa ka drayber sa traysikad nga molayat unta sa tulay niadtong Huwebes sa gabii nga maoy nakapahimo kaniyang “Super Hero” sa Talisay.

Ang gisikop niya nga mga truck mao ang Isuzu dump truck nga nagtangag sa plakang GHH-616 ug Isuzu Elf nga nagtangag sa plakang WTE-618 kansang ngalan sa mga drayber ug sa mga tag-iya sa maong mga sakyanan wala ikapatik sa blotter sa kapolisan.

Sumala sa kapolisan sa Talisay City Police Station, nga si Joavan ang gikagubtang anak ni Mayor Socrates Fernandez sa dakbayan sa Talisay mitawag sa ilang buhatan ug nangayo og police assistance nga maoy gitugyanan niya sa duha ka mga de kargang iyang nasikop.

Nasuta sa kapolisan nga ang matag de karga kargado sa bas ug graba nga 5 ka metro kubiko.

Gidala dayon sa kapolisan ang maong mga sakyanan ug anaa karon sa ilang kustodiya aron itugyan ngadto sa mga otoridad sa Department of Environment and Natural Resources (DENR).

Ang kagamhanan sa siyudad sa Talisay hugtanon sa ilang kampanya batok sa mangubkobay og bas ug graba sa sapa sa Mananga.

Gilauman sa taga Talisay nga tinud-anay na ang pagbag-o ni Joavan gikan sa pagkabadlungon niini sa milabay’ng mga adlaw.  (BANAT NEWS)