MOU sa polis ug media wa aprobahi

CEBU, Philippines - Nabara ang pagsagop og usa ka memorandum of understanding (MOU) tali sa Philippine National Police ug sa mga manager sa media tungod sa pipila pa ka mga butang nga angayang isukip sa nahisgutang MOU.

Ang tigom nga gipataliwad-an sa Cebu Citizens-Press Council (CCPC) niadtong Huwebes sa hapon, gitambongan sa mga kadagkoan sa kapolisan ug sa mga manager ug editor sa Radyo, Television ug Newspaper didto sa Marcelo B. Fernan Cebu Press Center sa barangay Lahug, ning dakbayan sa Sugbo.

Ang MOU nga gusto unta sa kapolisan nga pauyonan sa taga media mao unta ang pagsagop sa usa ka kasabotan nga sa panahon nga gitawag nga “crisis situation” sama sa mga hostage crisis o mga dagkong krimen diin makapahaling sa kainit sa sitwasyon ang pamalita nga himoon sa taga media, gusto sa kapolisan nga ipatigbabaw ang ilang balaod nga mag-awhag sa mga tigbalita sa paghatag og respeto kanilang mga polis ilabi na kun makita nila nga ang pagsibya sa hitabo sa akto nagkahulogan og dugang risgo sa kinabuhi sa hingtungdan sa krimen, sa publiko o kaha mismo sa taga media nga anaa sa palibot sa eksena o lugar nga nahitaboan sa krimen.

Apan wala kaaprobahi ang maong MOU dihang gipadayag ni Leo Lastimosa, manager sa DYAB Abante Bisaya ug opisyal sa Kapisanan ng mga Brodkaster sa Pilipinas (KBP) ug Newscaster sa ABS-CBN nga way angay mosanta sa misyon sa usa ka tigbalita kansang kaakohan mao ang pagpadangat sa kasayoran o balita ngadto sa katawhan.

Hinuon sukwahi sa baroganan ni Lastimosa, si Bobby Nalzaro, Newscaster sa GMA Channel 7 mipadayag og pag-uyon sa mga tumong sa kapolisan dinhi sa rehiyon nga gibase usab sa kamandoan nga naggikan sa ilang ulohang buhatan.

Gumikan sa panagsungi sa mga hunahuna ug baroganan, gihukom sa chairman sa Cebu Citizens-Press Council Pachico A. Seares nga isukip ang mga butang nga gisaysay ni Lastimosa aron mahan-ay ang balanse sa mga baroganan sa PNP ug taga media una uyoni sa tanan ang nahisgutang MOU.

Sa laing bahin ang gihan-ay nga usa ka palisiya pabor sa taga media sa paghatag og way bili sa unsa mang subpoena nga iluwat ni kinsa mang opisyal sa gobyerno batok ni kinsa mang sakop sa media nga nakahimo og balita nga nakatandog sa ilang pagkatawo o kaha garbo gumikan sa ilang pagka-opisyal sa kagamhanan.

Giisip sumala sa maong palisiya nga usa ka pagpangharas o pagpanghasi batok sa media ang lakang sa taga gobyerno pagluwat og subpoena aron sila ray moimbistigar sa maong tigbalita nga nahisupak sa balaod bahin sa Press Freedom , busa gibuot sa maong panukdanan nga walay katungod ang kinsa mang opisyal sa kagamhanan sa pagbuhat   sa ingon, busa dili kini angayang atubangon sa usa ka hingtungdang sakop sa media.

Kay kun may angayang mohimo og imbistigasyon sa kinsa mang taga media nga nakahimo og lalisonong balita, walay lain gawas sa manager o nagdumala sa media outlet nga nahimutangan sa usa ka tigbalita.

Apan kun gikinahanglan gyud sa usa ka opisyal sa gobyerno nga maminaw sa rason sa tigbalita bahin sa balita nga nakapalagot sa maong opisyal, mao ang paghatod sa iyang reklamo ngadto sa hukmanan ug adto didto ang tukmang lugar diin angayang moatubang ang usa ka sakop sa media sa imbistigasyon nga himoon sa walay dapigang maghuhukom. (BANAT NEWS)