CEBU, Philippines - Mga sakop sa minoriya sa konseho sa dakbayan sa Talisay milusad og kampanya batok malnutrition tungod sa report nga ang dakbayan maoy adunay labing taas nga kaso sa malnutrition sa tibuok rehiyon.
Sila si Konsehal Romeo Villarante, Danny Caballero ug Val Ylanan mipahigayon og feeding program diha sa kabarangayan sa siyudad.
Niadtong Domingo, ang nahisgutang mga konsehal uban sa grupo sa San Isidro Youth Club (SIYC) sa barangay San Isidro mipahigayon og feeding program sa kabataan diha sa barangay Camp 4 usa sa bukirang barangay sa Talisay.
Gawas niini nanghatag usab sila og bugas ngadto sa mga kabus nga mga residente sa lugar. Ang tulo ka mga nahisgutang konsehal nagkanayon nga ang ilang gibuhat pasalamat usab ngadto sa mga tawong mitabang kanila nga naabot sila sa ilang posisyon karon. Apan si Ylanan nagkanayon nga bisan kaniadto pa nga wala pa siya ma-konsehal sa siyudad nagpahigayon na siya og mga feeding program diha sa kabarangayan sa Talisay. (BANAT NEWS)