Mayor sa Davao mikulata sa court sheriff

CEBU, Philippines - Nakuha sa usa ka tv news crew ang gihimong aktwal nga pagkulata ni Davao City Mayor Sara Duterte sa usa ka court sheriff sa Davao Regional Trial Court Branch 15 nga mi-serve sa demolition order sa usa ka dapit sa Davao kagahapon (Biyernes).

Ang maong insidente nga gi-broadcast sa ABS-CBN News Channel (ANC) kagahapon nagpakitang gitawag ni Duterte ang court sheriff nga si Abe Andres.

Sa pagduol ni Andres kalit siyang gisukmag makadaghang higayon sa mayor ug gibira ang iyang buhok samtang gibinaklid sa mga lalaking kuyog ni Duterte.

Atol sa hitabo adunay mga unipormadong polis nga makita diha sa video footage apan wala dayon makapugong sa mayor sa gihimo niini ngadto ni Abe.

Gibinaklid pag-usab sa nakasibilyan nga lalaki ug gipalayo apan base sa footage daw gisekretohan kini og sukmag. Sumala pa sa report sa ABS-CBN News.Com, mihangyo si Duterte sa korte nga hatagan og duha ka oras nga extension ang mga residente sa Barangay Kapitan Tomas Monteverde Sr. Suliman, Agdao aron mobiya sa ilang mga balay apan giingong wala kini paminawa.

Tungod niini, gipangunayan pag-adto sa mayor ang lugar ug gikomprontase ang demolition team, sumala pa nga si Andres maoy mihatag og ‘go-signal’ sa demolisyon.

Ang demolisyon nahimong tensyonado human ang mga residente misukol sa mo-demolis. Si Duterte nagkanayon nga dili unta angay nga mag-abot ang mga residente ug ang demolition teams.

Si Andres gidala sa Southern Philippines Medical Center tungod sa paghuboy sa iyang mata ug uban pang bun-og. Si Andres sa interbyu sa ANC mibutyag nga wala siya magtuong buhaton kadto kaniya sa mayor tungod kay igo ra siyang nagtuman sa iyang trabaho. Gibana-banang moabot sa 500 ka pamilya ang nagpuyo sa 217 ka balay nga demolison.

Gipanghimakak ni Duterte ang pasangil nga siya nangulata apan iyang giangkon nga wa siya ka-kontrol sa iyang kaugalingon. (BANAT NEWS)