CEBU, Philippines - Ang paghimo sa siyudad sa Sugbo nga malambuon uban sa mga proyekto alang sa tanan , pagtinabangay tali sa siyudad ug sa kagamhanan sa probinsya maoy pipila lang sa mga unod sa State of the City Address (SOCA) ni Mayor Michael Rama nga gipahigayon kagahapon sa Plaza Sugbo.
Gipasalamatan ni Rama si Bise Mayor Joy Augustus Young ug mga konsehal gumikan sa pagtambayayong niini sa nagkadaiya niya nga mga programa ug mayoriya kanila mitambong sa maong kalihukan.
Mikabat sa 17 ka higayon nga gipasalamatan ni Rama si Young ug mga konsehal, samtang milungtad og usa ka oras ug duha ka minutos ang mensahe sa mayor samtang kapin sa 80 siya ka higayon nga gipakpakan sa katawhan.
Nagkanayon si Rama nga importante kaayo ang pagtinabangay sa katawhan aron dali nga makab-ot ang maayong dugang kauswagan sa siyudad.
Iya usab nga gituki ang pagpalig-on sa drainage system sa siyudad aron kalikayan ang pagbaha inigbundak uwan.
Nasayran gikan sa communication base sa buhatan ni Konsehal Roberto Cabarubias nga mikabat sa 10,000 ka tawo ang misaksi sa SOCA ni Rama nga gilangkoban sa mga opisyal ug empleyado sa City Hall, mga opisyales sa barangay, urban poor group, pribadong sektor ug mga senior citizen.
Matud pa sa mayor nga sa usa ka tuig sa iyang serbisyo, nakakita dayon siya og mga donor alang sa pagpaayo sa mga police station ug mga barangay health center.
Gipasigarbo usab sa mayor nga nagpadayon karon ang iyang scholarship program diin 5,800 ka mga kabos nga batan-on ang nakatungha sa kolehiyo.
Ang paghatag og housing project alang sa mga empleyado sa City Hall, mga magtutudlo, ug mga polis maoy usa sa giplanohan karon ni Rama.
Nagpadayon usab karon ang pagpasemento sa mga kadalanan ilabi na sa mga bukirang barangay.
Gidayeg usab ni Rama si Gobernador Gwendolyn Garcia gumikan sa pakigtambayayong niini sa mga proyekto sa siyudad sama sa beautification project sa downtown area ug uban pa.
Samtang si Garcia kinsa mitambong sa SOCA mipadayag nga suportahan gyud niya ang administrasyon ni Rama gumikan kay pareho sila og baruganan nga kinahanglan nga mag-uban ang probinsya ug siyudad alang sa pag-uswag sa Sugbo. (WC) (BANAT NEWS)