Drayber sa taxi gipatay sud sa sakyanan

CEBU, Philippines - Patay nang napalgan ang usa ka taxi driver sulod sa iyang sakyanan sa sitio Caingin, sa barangay Buaya dakbayan sa Lapulapu kagahapon sa kaadlawon.

Base sa nadiskubrehan nga ID naila ang biktima nga si Romulo Magdasal, 44, lumad nga taga Negros Oriental ug kasamtangang nagpuyo sa Univille sa barangay Banilad sa dakbayan sa Sugbu.

Si Magdasal driver sa Holiday Taxi nga adunay plaka nga GXS 473 diin nagdala sa body number 0569. Si Inspector Zenaido Pastorfide Jr., ang hepe sa Homicide Section sa kapolisan sa maong dakbayan nga nahinabi sa Banat News miingon nga usa ka Ramil Inot maoy nakakita sa taksi sa biktima nga gi-parking sa maong lugar apan nagsiga ang hazard lights.

Dihang iyang gisusi mao nalay nakit-an niya ang nagbuy-od nga biktima diha sa sulod sa maong sakyanan hinungdan nga mitawag siya sa kapolisan.

Dugang pa sa imbestigasyon nga usa ka Michael Saldua nga residente sa maong dapit mitug-an nga nianang ala-una sa kaadlawon dunay taxi nga misulod sa maong dapit ug nahibulong kini nga wala mogawas hinungdan nga iya kining gisusi.

Sa pagresponde sa kapolisan nasuta nga adunay samad pinusilan sa iyang tangkugo nga milahos sa aping ang biktima, aduna sad kini samad pinusilan sa ulo, dughan ug kamot. Ang bala milahos pa gyud og kaigo sa side mirror sa maong sakyanan.

Nadiskubrehan usab sa iyang bulsa ang kwarta nga balor P1,755 nga gituohang kinitaan niini hinungdan nga nagtuo ang kapolisan nga dili tulis ang motibo sa maong pagpamusil ug posibleng dunay personal nga kasuko ang mihimo niini.

Nakuha usab sa sulod sa taksi ang tulo ka slugs sa gituohang gikan sa bala sa armas nga gigamit sa mga kriminal.

Wala usab silay nakitang senyales nga dunay kaguliyang sulod sa taxi maong posibleng kaila ra sa biktima ang mamumuno.

Si Lou Resogento nga radio operator sa Holiday taxi nga nahinabi sa Banat News miingon nga kapin na sa 11 ka tuig na nilang drayber ang biktima ug wala siya makamatikod nga aduna kini gikaaway.

“Buotan ug maayong tawo man na siya, wala gyod mi makamatikod nga duna na siyay kontra,” matud pa ni Resogento.

Samtang si Jay-ar Magdasal, anak sa biktima naglibog kung kinsa ang mipatay sa iyang amahan nga wala man silay nahibaw-ang kontra niini.

Ang kapolisan padayon pa sa ilang imbestigasyon pagkuha og dugang impormasyon sa maong krimen nga gidudahang binuhatan sa dili lamang usa ka tawo nga mga mamumuno.  (BANAT NEWS)