Gibiyaan sa asawa naghikog

CEBU, Philippines - Bana nga gibiyaan sa iyang asawa naghikog ug namatay sulod sa ilang pinuy-anan sa miaging gabii diha sa barangay Bulacao siyudad sa Sugbu.

Ang naghikog giila sa kapulisan nga si Joselito Morillo, 26, ug nagpuyo sa nahisgutang lugar.

Sigun sa imbestigasyon nila ni PO3 Victor Ruel Ayuman, PO3 Goeffrey Gutual, PO3 Ruth Violango, PO2 Cristobal Geronimo ug PO2 Juluis Regis sa Homicide Section sa Cebu City Police Office (CCPO), si Morillo nakit-an nalang sa inahang si Antonia nga nagbitay ug wala nay kinabuhi sulod sa ilang balay.

Usa ka extention wire ang gigamit niini sa paghikot sa liog ngadto na sa ibabaw nga bahin sa balay aron magbitik sa liog.

Si Geronimo nga nahinabi sa Banat News nagkanayon nga mitug-an kanila ang inahan nga naguol iyang anak human gikawat ang motorsiklo niini sa miaging buwan nga gidata-datahan.

Mao sad kini ang gigamit sa anak sa iyang panginabuhian isip usa ka maintenance technician sa computer nga hulgan og piso-piso apan gumikan sa pagkawat sa iyang motor nawad-an kini og trabaho.

Kini usab ang giingong hinungdan sa kanunay nga paghubog-hubog ni Morillo nga miresulta sa panag-away sa iyang asawa ug niadtong petsa 25 sa Hunyo milayas ug miuli sa ginikanan ang iyang asawang mabdos sa ikaduha nilang anak.

Ang kapulisan nakakuha og suicide note nga gisuwat ni Morillo sa papel nga nagkanayon ‘paita nimo brad uy (tawag niya sa asawa) nawagtangan pa ta og motor, dapat mosuporta unta ka nako apan imo hinuon ming gibiyaan ni inday (kamaguwangang anak).” (BANAT NEWS)