Urban poor sa Talisay pabor balhinon ang merkado

CEBU, Philippines - Kung ang mga vendors sa merkado publiko sa barangay Tabunok, dakbayan sa Talisay nagdumili sa pagbalhin ngadto sa bag-ong merkado sa barangay Lagtang ang grupo sa urban poor sa siyudad uyon nga mabalhin ang merkado ngadto sa Lagtang.

Si Alexander Gabi, secretary sa Federation of Talisay City Urban Poor Dwellers Association (FETCUDA) nagkanayon nga kinahanglan pud silang motingog tungod kay sila ang nagrepresentar sa bagang sektor sa siyudad ug usa usab sila sa stakeholders tungod kay mga mamalitay usab sila diha sa merkado.

Gibutyag ni Gabi nga sa ilang mga board meetings nauyonan sa ilang pundok ang plano sa kagamhanan sa siyudad nga ipasirado ang merkado diha sa Tabunok ug pabalhinon ang mga vendors ngadto sa Lagtang.

Matud ni Gabi nga si Sherwin Echavez, usa sa mga vendor diha sa Tabunok ug miyembro sa board mao lang ang misupak sa nahisgutang mosyon tungod kay naapektohan siya niini.

Gipasabot ni Gabi nga ang merkado dili mobarog o mabuhi kung pulos lang mga vendors, ang mga mamalit dunay dakong papel isip konsumidor ang ilang sektor hinungdan nga miluwat na sila sa ilang baruganan.

Sobra sa 5,000 ka mga miyembro sa FETCUDA ang mipirma sa ilang position paper nagsuporta sa plano sa siyudad pagbalhin sa mga vendor sa Tabunok ngadto sa Lagtang.

Gibutyag usab ni Gabi nga ang FETCUDA dunay sobra sa 6,000 ka mga miyembro ug niadtong buwan sa Mayo niining tuiga naglusad sila og signature campaign pabor sa plano sa kagamhanan sa Talisay.  - BANAT NEWS