CEBU, Philippines - Gipahibalo sa assistant head sa Department of Public Services nga si Randy Navarro nga dunay mga taga laing nasud ug mga local government units ang miduaw sa composting site sa Inayawan Sanitary Landfill aron pag-obserbar sa atong siyudad sa pagpatuman niini sa “No Segregation, No Collection Policy” gumikan sa posibleng i-apply kini sa ilang dapit.
Sumala pa ni Navarro dako kining garbo gumikan kay gihimong modelo ang siyudad sa Sugbo sa ubang lugar alang sa saktong paghipos sa mga basura.
Bag-ohay pa lang, miduaw ang taga Nueva Ecija, Negros Occidental ug duna pu’y mga taga Canada , Belgium ug uban pa.
Giangkon ni Navarro nga mga tawo gikan sa World Bank niadtong milabay’ng adlaw misuroy usab sa landfill ug iyang gipanglantawan nga motabang kini sa pag-develop sa maong area.
Samtang ang head sa DPS nga si Engr. Dionisio Gualiza miangkon nga 80% na karon sa mga residente sa siyudad sa Sugbo ang mituman sa polisiya sa pagbahig sa mga basura ngadto sa malata ug dili malata.
Matud pa niya nga kanunay na usab karon nagtuyok-tuyok ang iyang mga tawo sa hotspot areas nga mao ang mga lugar nga wala kaayo motuman sa maong polisiya.
Gipaniguro sa maong departamento nga saktong oras gyud maabot ang mga garbage truck ngadto sa ilang mga area aron modumdum na ang mga tawo sa paglabay sa ilang mga basura ug dili na kini magpasad sa ilang dalan.
Nagkanayon si Gualiza nga dako kaayo og kontribusyon niini ang mga opisyales sa barangay nga mikooperar sa ilang kampanya.
Nasayran nga gikan sa kapin sa 400 ka tonelada nga basura nga ilabay sa composting site sa sanitary landfill kaniadto matag adlaw kapin na lang kini sa 200 ka tonelada ang ilabay sa maong landfill.(EIM)(BANAT NEWS)