Abogado ni Cortes biktima sa katabang
CEBU, Philippines - Gibanabanang kapin P100 mil nga balor sa mga kabtangan ang nasakiyo sa mga kawatan gikan sa panimalay sa abogado ni Mayor Jonas Cortes sa dakbayan sa Mandaue nga nagpuyo sa BF Homes, sa sitio Abuno, Pajac, Lapulapu sa milabay’ng gabii.
Ang biktima mao si Atty. Hedelito Pascual, residente sa maong dapit, ang kapolisan sa pasiunang imbestigasyon nagdudang posibleng giunay kini og biktima sa kaugalingong katabang.
Matud pa ni Pascual usa ka “Marites” (apilyedo nakalimtan sa biktima) ang misulod kaniya isip katabang sa milabay’ng tulo ka adlaw aron mobantay sa iyang anak atol sa iyang tingtrabaho.
Sa milabay’ng gabii mga alas 9:30 atol sa pag-abot ni Pascual nahibulong kini nga wala na diha ang iyang katabang ug gibiyaan ang bata ug sa pagsusi sa lawak sa biktima guba na ang ilang masters bedroom.
Sa iyang pagsusi, nahanaw na ang iyang laptop, digital camera, cell phone ug uban pa nga gibanabanang mokantidad sa kapin P100 mil.
Ang kapolisan padayon pang nagsusi sa maong hitabo apan duna silay pagdudang posibleng dili lang kini ang unang higayon nga gibuhat sa maong suspek ngadto sa agalon.
Si SPO1 Federick Eslit sa Theft and Robbery Section mitambag niadtong mga tawong mokuha og katabang nga kinahanglang makuhaan una nila kini og mga detalye sa pagkatawo sa dili pa kini pasudlon. (BANAT NEWS)
- Latest
- Trending
