Tungod sa iro lalaki napusilan

CEBU, Philippines -  Gumikan sa iro, napusilan sa usa ka tindero og siomai ang usa ka lalaki nga iyang silingan didto sa dalan D. Jakosalem ,sa barangay Zapatera, ning siyudad sa Sugbo sa miaging gabii.

Ang biktima nga samdan sa tulo ka bala   mao si Quirino Gonzaga, 42, ulitawo, apan adunay kapuyo ug residente sa maong lugar.

Samtang ang gitumbok nga suspetsado mao si Gemmar Sacidon, 24, ulitawo apan aduna say kapuyo ug silingan sa biktima.

Si PO2 Jodan Batucan sa Homicide Section nga nahinabi sa Banat News nagkanayon nga sa wala pa mahitabo, ang biktima ug ang iyang kapuyong si Margarita ug ang silingan nila nga si Jun-jun, nag-inom gawas sa ilang gipuy-an.

Si Janlyn Bahao, kapuyo sa suspetsado mimando sa biktima nga papahawaon niini ang iyang iro nga niadtong higayona naglubog ug usahay nagpaso-paso sa gipuy-an sa suspek. Matud ni Batucan nga didto ang panaglalis sa biktima ug Janlyn hangtod nga miingon kuno ang biktima nga ‘ah lugoson ta hinuon ka ron’.

Ang suspetsado nga nakadungog sa gisulti sa biktima nagkalalis na usab hangtod nga mikuha ang suspek og armas ug gipusil sa makadaghang higayon ang biktima. Si Gonzaga nahiagom og samad pinusilan sa walang bukton, ug duha usab sa lawas ug gidali paghatud sa mga silingan ngadto sa Cebu City Medical Center (CCMC) samtang ang suspek daling misakay og taxi ug misibat.

Matud ni Batucan nga dunay karaang panagbikil ang biktima ug ang suspek kay kanunay lang mahubog ang biktima unya ‘magmaoy’. Gani kapila na ka higayon nga gialarma ang biktima sa kapolisan sa Parian kun magmaoy tungod sa kahubog niini. (BANAT NEWS)