50 ka armas sakmit sa CIDG

CEBU, Philippines -  Mikabat sa 50 ka mga nagkalain-laing armas de fuego ug mga kahimanan sa paggama og armas nga nagkantidad og P 6 milyones ang nasakmit sa sa mga sakop sa Criminal Investigation and Detection Group (CIDG) Central Visayas sa ronda nga ilang gilusad   sa usa ka pabrika sa armas didto sa barangay Dunggo-an, sa dakbayan sa Danao kagahapon sa buntag.

Ang gironda sa mga sakop sa CIDG dala ang Search Warrant nga giluwat ni Judge Silvestre Maamo Jr., sa Regional Trial Court Branch 17 mao ang pabrika sa Workers League of Danao Multi Purpose Cooperative (World MPC) sa Dunggo-an.

Si Supt. Romano Cardeño, luyo-luyong pangulo sa CIDG nagkanayon nga kaniadto pang Disyembre 20, 2010 nabahas ang permit to operate sa maong pabrika ug wala na kini ma-renew sa mga tagdumala.

Matud pa ni Cardeño nga base sa ilang intelligence report kasagaran sa mga kliyente sa maong pabrika mga sakop sa New Peoples Army (NPA) ug ang mga politiko dinhi sa Kabisay-an ug ubang bahin sa Pilipinas.

Ang mga armas mikantidad og P1 ka milyon, samtang ang mga kahimanan ug mga piyesa mibalor usab og P5 milyones.

Midugang siya nga aduna pay laing pabrika kansang ngalan wala pa ibutyag ang ilang gipanid-an sa maong dakbayan kansang permiso nabahas na usab apan nagpadayon gihapon sa ilang operasyon.

Samtang sa buwag nga operasyon sa CIDG, nasakmit usab ang 13 ka mga right hand drive nga sakyanan nga gi-chop chop.

Kini dihang gironda sa CIDG ang usa ka bodega sa Sha Japan Auto Surplus Supplier nga nahimutang sa C.L Benedicto Building Vera St. North Reclamation Area.

Matud sa CIDG-7 nga gawas sa 13 ka right hand drive nga anaa karon sa ilang buhatan, aduna pay lain nga right hand drive nga ilang kuhaonon.

Wala pa hinuon mohatag ang CIDG kun pilay kantidad sa maong mga sakyanan.(WC)(BANAT NEWS)