'Asset' gitumba diha sa Carreta

CEBU, Philippines -  Usa ka lalaking gidudahang asset sa kapulisan ang gipusil patay sa wala pa mailhing tawo sa sudlonon nga bahin diha sa sitio Ponce 2 sa barangay Carreta ning siyudad sa miaging alas 9 pasado sa gabii.

Ang biktima nailhan lang sa angga nga ‘Caloy’ gibana-bana sa kapulisan nga nagpangidaron og 25 ngadto sa 30-anyos walay klarong pinuy-anan.

Subay sa imbestigasyon nila ni SPO4 Alex Dacua, PO2 Jodan Batucan, PO2 Edario Manatad ug PO2 Michael Codaste sa Homicide Section, naglakaw ang biktima sa maong dapit ug pag-abot sa ngitngit kalit lang gipusil sa makadaghang higayon ug nahagba.

Si Batucan nga nahinabi sa Banat News miingon ang mga residente sa dapit nakadungog og duha ngadto sa upat ka sunodsunod nga buto sa armas ug sa dihang gisusi ang dapit nakit-an nalang ang biktima nga nagkadugo ug dunay mga samad pinusilan.

Ang mga sakop sa Emergency Rescue Unit Foundation (Eruf) nga miresponde misuway sa pagtabang sa biktima apan patay na kini tungod sa samad pinusilan sa walang dughan, nawong ug kilay nga maoy nakaingon sa iyang hinanaling kamatayon.

Mga sakop sa Crime Scene Investigation Unit (CSIU) walay nakuhang kabhang apan dunay nakit-an nga usa ka slug sa wala pa matinong bala.

 Matud ni Batucan nga dugang nilang nasayran sa wala pa ang hitabo nagduwa og billiard sa maong lugar ang biktima ug milakaw kay matud pa mopalit kuno og sigarilyo ug igo lang nakabiya sa bilyaran napulo ngadto sa 20-metros gipusil dayon kini.

Matud ni Batucan ilaha pang i-check kun tinuod bang asset sa kapulisan ang biktima sanglit wala say mianha sa ilang buhatan nga sakop sa PNP nga nag-ila nga asset ang biktima.

Dugang nakuha nga impormasyon sa kapulisan nga pirmeng mag-anhaan sa dapit ang biktima apan wala gyuy nakaila sa tinuod nga bansagon niini.

Ang sitio Ponce 2 naila na kaayo nga daghang namaligya og ginadiling drogas hinungdan nga wala isalikway sa mga imbestigador nga posibleng may kalambigitan sa ilegal nga drugas ang motibo sa krimen.(BANAT NEWS)