Way paumento sa buhis karon - Oliva

CEBU, Philippines -  Gipasalig ni Cebu City Treasurer Ofelia Oliva nga walay tax increase nga ipatuman ang kagamhanan sa dakbayan sa Sugbo luyo sa gitinguha ni Mayor Michael Rama nga paabton og P10 bilyones ang budget sa siyudad sa sunod tuig.

Nagkanayon si Oliva nga ilang paningkamotan nga makuha nila ang maong target ug ang estrikto nga pagpakolekta sa buhis maoy solusyon niini ingon man usab ang pag-umol og re-validation sa tanang mga establisamento ilabi na sa mga residential area.

Dugang pa ni Oliva nga ilang sutaon kadtong mga residential area ug tan-awon ang mga balay kansang silong o pikas bahin niini gihimo nang tindahan o kaha imnanan sa tag-iya.

Matud pa niya nga kung ingon niini ang nahitabo sa usa ka balay, pabayron ang tag-iya og multa segun sa gidugayon sa iyang paghimong tindahan sa usa ka bahin sa iyang balay.

Midugang siya nga iyang paninguhaon nga makab-ot gyud ang gi- target sa mayor kay alang ra man usab kining igasto sa mga maayong proyekto alang sa katawhan.

Usa sa giplano sa mayor nga mapalapdan gayud ang mga dalan sa kabukiran alang sa kasayon hakuton sa mga produkto sa kaumahan paingon sa merkado sa dakbayan.

Gawas niini,sayon na lang adtoon sa katawhan ang mga nindot nga lugar sa kabukiran sama sa falls nga wala pa kaayo mailhi karong panahona gumikan kay dili pa makasulod ang mga sakyanan sa ubang dapit sa kabukiran. (BANAT NEWS)