Joavan wala pa lung-i sa kontrobersiya

CEBU, Philippines -   Gialarma sa kapulisan sa dakbayan sa Sugbo ang kontrobersyal nga sinagop ni Mayor Socrates Fernandez sa dakbayan sa Talisay nga si Joavan Fernandez kagahapon sa kaadlawon diha sa balay ‘Alampoanan sa Vista Grande sa barangay Bulacao siyudad sa Talisay.

Si SPO1 Jeoffrey Diola, sakop sa City Intelligence Branch (CIB) sa Cebu City Police Office (CCPO) mitug-an sa mga tigbalita nga gahapon sa kaadlawon mga ala 1:50 mianha sa ilang buhatan ang usa ka Sarah Bernijo nga taga Gorordo Avenue nga nagdali-dali nga daw dunay gikalisangang tawo ug nangayo og tabang.

Matud pa nga si Bernijo nagpatabang aron luwason ang 17-anyos nga anak nga tomboy kinsa giingong mi-text kaniya nga nagtago siya sa usa ka kalibonan sa Vista Grande Subdivision sa Bulacao, Talisay ug nagpatabang tungod kay gigukod kini ni Joavan Fernandez nga nagbitbit og kalibre .45 pistola kay buot siyang patyon.

Si Diola daling mitawag sa hepe sa Talisay City Police Station nga si Chief Insp. Eddie Recamara kabahin sa reklamo. Matud pang Diola sa ilang pag-abot sa balay ni Joavan alas-2 pasado sa kaadlawon naabtan nila kining namintal sa iyang Big Horn nga sakyanan. Dihang ilang gipangitaan sa 17-anyos nga tomboy kinsa giingong anak sa usa ka Amerkano migawas ang maong batan-on apan dihang ilang gipangutana mihimakak kining gigukod ug buot siyang patyon ni Joavan.

Ang maong ‘false alarm’ nakapasagmuyo sa mga polis batok sa tomboy, hinuon nangayo og pasaylo ang ginikanan sa maong batan-on ngadto sa mga polis.

Nasuta nga buot diay palayason ni Joavan ang maong batan-on apan wala kini ikaplete. Si Diola gitug-anan ni Joavan nga ‘manghilabot’ ang maong batan-on maong buot niyang palayason.

Si Diola nagkanayon nga nag-away diay ang tomboy sa uyab niining babaye nga anaa ra sab sa balay ‘Alampo-an’ mag-estambayan.

Hinuon nadala sa kapulisan ang tomboy kuyog sa iyang inahan. Matud pang Diola mitug-an kanila ang tomboy nga gikan pa sila sa iyang hinigugma sa Butuan City ug nagkaila sila ni Joavan ug gi-recruit nga pasudlon og trabaho sa usa ka KTV Bar. (BANAT NEWS)