Magtutudlo gipasidan-an sa DepEd

CEBU, Philippines - Ang Department of Education (Dep-Ed) mipasidaan pag-usab nga kutob sa mga magtutudlo sa tunghaang publiko nga mamugos pagpaningil og amot sa mga estudyante sa elementarya ug high school mapahamtangan og silot.

Ang maong pasidaan gihimo ni Regional Director Ricaredo Borgonia sa Dep-Ed 7 base sa direktiba sa ulohan nilang buhatan nga nagpatuman sa balaod nga “no collection policy”.

Matud pa ni Borgonia nga ang gitukod nga Parents and Teachers Association sa matag eskuylahan maoy gitahasan sa pagpangolekta sa mga amotan sa mga kabataan.

Kini tungod kay ang mga ginikanan sa mga estudyante pulos man sakop sa PTA sa matag tulunghaan, matud pa ni Borgonia.

Gi-klaro sa director nga kun adunay kolektahong amot kinahanglang sabot-sabotan una ug uyonan sa tanang ginikanan ang maong amotan, una kini ipatuman.

Midugang si Borgonia nga sa higayong makadawat sila og reklamo nga may labot sa pagpaningil sa mga magtutudlo og pinugsanay nga amot sa mga estudyante diha-diha ilang ipaubos sa imbistigasyon ang magbuhat sa ingon.

Giangkon ni Borgonia nga dili gyud kalikayan ang mga panginahanglan sa matag tunghaan nga makapapugos pagpangolekta og amotan ngadto sa mga ginikanan apan kinahanglang uyonan kini sa tanang mga ginikanan.

Matud pa niya nga ang bugtong buhaton sa magtutudlo ug principal kun adunay mga panginahanglan sa eskuylahan nga nagkinahanglan og gasto, mao ang paggamit sa ilang operating expenses, nungka nga ipapas-an kini sa mga ginikanan sa dili hustong proseso.  (BANAT NEWS)