Pagbalhin sa mga vendors gi-postpone

CEBU, Philippines - Si Mayor Socrates Fernandez   sa dakbayan sa Talisay mi-postpone na usab sa pagpabalhin ngadto sa merkado sa Lagtang sa mga vendors, sa petsa nga wala nay klaro.

Kini human sa hinugtanay nga   pagsupak sa mga vendors sa Tabunok Public Market sa mando nga pagpabalhin kanila ngadto sa bag-ong merkado sa Lagtang.

Kagahapon, Hunyo 28 maoy gitagal sa kagamhanan sa Talisay sa hingpit nga pagpatak-op sa merkado sa Tabunok ug katapusan usab nga higayon alang sa mga vendors aron mobalhin ngadto sa Lagtang.

Apan nanumpa ang mga vendors nga pakamatyan nila ang ilang pagsupak sa awhag sa kagamhanan, hinungdan nga nawad-an og umoy ang mayor ug wala na mopadayon sa pagpabalhin sa mga vendors.

Pipila sa mga rason nganong dili mobalhin ang mga vendor, ngadto sa merkado sa Lagtang mao ang kakuwang og luna nga paradahan sa mga traysikol, may 86 ra ka stall sa isdaan ug kuwang kaayo nilang 180 ka mga fish vendors, daplin sa sapa ug delikado kaayo kung magbaha, ug uban pang mga katarungan.

Si Shervin Echavez ang media officer sa mga vendors nagkanayon nga ilang gisumbong kang Presidente Benigno Aquino ang maong problema niadtong Lunes sa pagduaw sa Pamuno nasud sa dakbayan sa Naga.

Matud ni Echavez nga destinohan sa Pamuno nasud og mga miyembro sa Presidential Management Staff (PMS) nga maoy moimbestigar ning maong problema.

Nasayran nga ang merkado sa Lagtang gigahinan sa kagamhanan og P148 milyones diin P105 milyones niini iya sa nasudnong pundo, samtang P43 milyones ang gikan sa panudlanan sa dakbayan sa Talisay. (WC) (BANAT NEWS)