Babaye gi-aping pagpusil

CEBU, Philippines -  Kritikal ang kondisyon sa usa ka babaye human kini pusila didto sa sitio Naga, barangay Babag 2, dakbayan sa Lapu-Lapu sa miaging gabii.

Ang biktima mao si Maria Liz Alcantara, hingkod, minyo, ug residente sa sitio Ilaya, barangay Agus sa maong siyudad, samtang ang suspetsado giila lang sa ngalang Warren.

Sumala sa kapolisan nga naglingkod sa daplin sa karsada ang biktima samtang nagpaabot sa iyang higala.

 Unya kalit lang mihunong ang usa ka motorsiklo nga gisakyan ni Warren ug sa kauban niining wala hiilhi ug nakig-estorya sa biktima.

Unya human nila og estorya, misakay ang suspetsado sa motorsiklo nga gimaneho sa kauban niini dayon giluthang ang biktima.

Si Alcantara nasabak sa walang aping ug sa walang dughan ug gidali kini paghatod ngadto sa Lapu-Lapu District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.

Si PO2 John Carlo Jocutan sa Lapu-Lapu Police Station nagkanayon nga si Alcantara human maigo sa mga bala nakadagan pa paingon ngadto sa gymnasium ug nakapangayo og panabang.

Ang mga residente sa maong lugar mao nay midala sa biktima ngadto sa tambalanan.

Si Jocutan mibutyag nga nagtuo sila nga illegal nga drugas ang hinungdan sa maong pagpamusil tungod kay base sa ilang nahipos nga report ang kapuyo ni Alcantara giingong usa ka drug pusher.

Ang kapolisan mipahigayon na og follow-up nga imbestigasyon sa maong insidente. (Ug Ria Mae Y. Booc sa The Freeman/WC) (BANAT NEWS)