Manag-inahan nahilo sa buriring

CEBU, Philippines -  Patay ang usa ka 60-anyos nga inahan ug anak niyang mananagat human makakaon sa gigisal nga isdang buriring nga ilang gisud-an sa pamahaw niadtong Domingo sa buntag sa barangay Daanlungsod sa lungsod sa Medellin.

Ang nangahilo ug namatay nga wala na madala pa sa tambalanan mao si Remedios Apas, 62, ug ang iyang anak nga si Lenito Apas, 30, pulos molupyo sa nahisgutang lugar.

Gibutyag ni Adelaida dela Cruz, ig-agaw ni Lenito dihang nakahinabi sa Banat News sa telepono human makakaon ang duha sa maong isda mireklamo silang nanakit ang tiyan ug naglimbag-limbag tungod sa kasakit dungan sa pagsuka-suka.

“Naglimbag-limbag gyud sa kasakit sa tiyan, si Lenito hapit gud daw kuno molusot sa bungbong, samtang iyang mama (Remedios) nagmulo sa tiyan unya nagsige’g suka,” matud pang Adelaida nga nahinabi sa Banat News sa telepono base usab sa gitug-an kaniya sa ubang mga kabanay.

Si dela Cruz sa linaing interbyu sa DyDD mitug-an ang iyang bana kuyog ni Lenito ug igsuon niini nga sila si Junie ug Roberto ug ang bayaw sa biktima nga si Esteban migikan niadtong Sabado sa hapon paingon sa barangay Paypay aron manawom og isda.

Ang laing igsuon sa biktima nga si Julie giingong maoy nanugon kang Lenito nga padad-on kini og buriring. Sumala pang dela Cruz nauli ang iyang bana ug mga ig-agaw niana nang alas-5 sa buntag sa adlaw’ng Domingo ug nakakuha gyud og dagkong isda lakip na ang isdang buriring.

Samtang gisuroy sa asawa sa namatay nga si Lenito ang ubang isda gilimpyuhan sa igsuon niini nga si Julie ang buriring ug ang ilang inahan (Remedios) maoy migisa niini.

Gawas sa namatay, lakip sa nakakaon mao ang kamaguwangang anak ni Lenito apan wala ra kini maunsa, apan ikaduha ug ikatulo niining anak gibati og panglipong-lipong ug nagmulo sa ilang tiyan.

Sumala pa nga human magmulo ang mga bata kansang mga pangalan wala ibutyag ni dela Cruz dali nga gipainom sa mga kabanay og silingan og espisong tono sa lubi ug gipakaon og kamay (asukar).

Apan sila si Remedios ug Lenito wala na matabang pa og nakabsan gyud sa kinabuhi.

Matud pa ni dela Cruz nga niadtong higayona nga nagmulo sa kasakit sa ilang mga tiyan ang inahan ug anak, nagpunay usab og panghilak ang mga anak ni Lenito apan walay miduol nga mga silingan sa pagtuong nag-away kay mao kini kasagaran mahitabo basta makainom ang magsuon maglalis dayon.

Ang panghitabo wala ma-blotter sa buhatan sa Medellin Police Station sumala ni SPO4 Carlos Cundino dihang gitawgan sa Banat News kagahapon.

Apan ang public health nurse sa lungsod sa Medellin nga si Vernito Montesclaros nga molupyo ra usab sa maong barangay mikompirmar nga gilubong na gahapon sa buntag ang mga namatay diha sa sementeryo sa barangay Daanlungsod sa Medellin.

Gani iyang gitug-an nga nangayo na ang pamilyang Apas sa death certificate kagahapong adlawa ngadto sa ilang municipal health officer nga si Dr. Jude Palileo.

Matud ni Montesclaros kanunay silang mipasidaan sa mga molupyo nga gidili gyud ang pagkaon sa isdang buriring tungod kay aduna kini makahilong parte sa lawas.

Apan tungod usab sa kalisod ug gawas pa mas sayon kining dakpon ang maong klase sa isda pipila sa mga mananagat ang mosugal sa pagkaon niini. “Nagsige man mi og remind nga dili ipakaon, tungod siguro sa kawad-on unya dunay higayon nga kana ra ilang kuha mapugos nalang pagkaon,” matud pang Montesclaros. (EIM) (BANAT NEWS)