Rama, misumbong kang P-Noy

CEBU, Philippines - Pormal na nga gitaho ni Mayor Michael Rama kagahapon ngadto kang Presidente Benigno Simeon “Noynoy” C. Aquino ang iyang estado karon sa politika dinhi sa Siyudad sa Sugbo partikular na sa pagbiya niya sa Bando Osmeña Pundok Kauswagan (BOPK).

Nagkanayon si Rama nga iyang gipasalig sa presidente nga magpabilin gihapon siya sa Liberal Party bisan wala na siya sa BOPK. Wala hinuon idetalye ni Rama ang reaksyon ni Aquino sa ilang panag-istoryahay.

Ang duha nag-uban kagahapon didto sa Naga atol sa pagbukas sa usa ka power plant sa maong dapit.

Dugang pa niya nga may mga tag-as nga opisyal sa Liberal ang nasayod na sa maong problema ug kanunay na kini nga naniid sa dagan sa politika dinhi sa Sugbo.

Gipasalig usab ni Rama ngadto sa presidente nga dili maapektohan ang pagtunol niya sa mga basic services bisan gikabangi niya ang laing kaalyado sa Liberal nga si Kongresista Tomas Osmeña.

Matud pa sa mayor nga kinasing-kasing ang pagbiya niya sa BOPK gumikan kay aduna siya’y gisunod nga prinsipyo alang sa kaayohan sa kadaghanan. (BANAT NEWS)