Waste power plant tukoron

CEBU, Philippines - Gituohang masulbad na ang suliran bahin sa basura sa dakbayan sa Mandaue kun matukod na ang waste power plant.

Mao kini gibutyag ni Manlalaban Benjamin Cabrido kinsa usa ka environmental advocate ug consultant on environment sa maong dakbayan sa usa ka press conference nga gipahigayon.

Matud pa niya nga ang waste energy nga makuha gikan sa mga basura makahatag og 1.2 megawatt nga kuryente nga maoy konsuno sa mga street light ug sa tibuok buhatan sa city hall sa maong dakbayan.

Gipasabot ni Cabrido nga ang bacteria nga makuha gikan sa madugta nga basura makamugna og kuryente nga makatabang sa gikinahanglang suga nga dagitabnon sa siyudad.

Dugang pa ni Cabrido nga sa miaging katuigan sa wala pa hingusgi pagpatuman ang Republic Act 9003 kon Solid Waste Management Act of 2003 mokabat sa tag 270 ka tonelada matag adlaw ang basura nga isalibay ngadto sa dumping site.

Sa pagsulod sa tuig 2010 dihang gipatuman nang higpit ang tukmang paghipos ug paglabay sa basura mikunhod ngadto sa 170 tonelada nalang, hangtod nahimong 120 tonelada nalang karon matag adlaw ang mga basura nga itapok sa basurahan sa siyudad.

Gitataw ni Cabrido nga sa pagkakaron 12 na lang sa 27 ka barangay sa Mandaue ang wala pa makapatukod og Material Recovery Facilities (MRF) ug kadtong wala pa makatuman niini , gihatagan lang og usa ka bulan sa kagamhanan sa Mandaue.

Gipasabot niya nga ubos sa waste power plant nga proyekto dili dakong kantidad ang gikinahanglan sa kagamhanan sanglit sa pakisusi nga iyang gihimo kubos lamang ang galastohan alang sa pagtukod sa maong proyekto. (BANAT NEWS)