Pusher nasakmita'g 13 ka linikit marijuana

CEBU, Philippines - Nasakmit sa kapolisan ang 13 ka mga linikit nga pinaugang dahon sa marijuana gikan sa usa ka batan-ong lalaki nga gikatahapang drug pusher sa sitio Sapa-Sapa, barangay Ibabao, dakbayan sa Mandaue sa miaging gabii.

Ang nadakpan mao si Ricky Padayon, 23, minyo nga nagpuyo sa maong dapit.

Ang midakop sa maong suspetsado mao ang team sa kapolisan sa Presinto 5 sa Opao Police Station sa Mandaue City Police Office (MCPO) nga gipangulohan sa hepe sa maong presinto nga si Inspector Wilson Abot.

Si PO1 Melvin Palayo sa kapolisan sa Presinto 5 nga nahinabi sa Banat News miingon nga nakadawat sila og mga pasiunang kasayoran labot sa illegal nga kalihokan ni Padayon sa maong lugar nga nagpadayon sa iyang illegal nga negosyo.

Busa gipanid-an dayon sa kapolisan ang maong suspek ug dihang nasuta nga positibo ang taho, gihimo dayon nila ang buy bust operation.

Si PO1 Pelayo miingon nga naglakip sa mga ebidensiya nga makapalig-on sa kasong kalapasan sa Republic Act 9165 kon Comprehensive Dangerous Drugs Act nga ilang ipasaka batok sa maong dinakpan mao ang 13 ka linikit sa pinaugang dahon sa marijuana, minarkahang salapi nga gibayad sa usa ka police decoy, ngadto sa suspek, ug uban pa.

Si PO1 Pelayo miingon nga ang dinakpan nga gibalhog na karon sa ilang detention cell sa Opao Police Station apan gikatakdang ibalhin kini sa Mandaue City Jail sa higayon nga mapasaka na ang kaso batok niini ngadto sa korte. (BANAT NEWS)