Curfew gipatuman sa barangay

CEBU, Philippines - Gipatuman karon sa pipila ka barangay sa dakbayan sa Mandaue ang curfew hour alang sa mga menor de edad nga nagpanuigon og 17 anyos paubos nga nagdili kanila sa paggawas sa balay sa taliwala sa alas 10:00 sa gabii hangtod sa alas 4:00 sa kaadlawon.

Ang barangay kapitan sa Subangdaku nga mao usab ang federation president sa Association of Barangay Council (ABC) nga si Kapitan Ernie Manatad maoy nag-una sa pagpatuman sa curfew hour sa mga batan-on sa iyang barangay.

Nasayran sa Banat News nga gisundog usab sa uban pang kabarangayan sa dakbayan ang pagpatuman sa curfew hour sama sa gipatuma sa Subangdaku.

Matud pa ni Manatad nga daghan nang mga barangay sa dakbayan sa Mandaue ang mipatuman sa balaod sa curfew sa tuyo nga kaminusan ang krimen nga naglambigit sa mga menor de edad.

Ang pagpatuman sa Curfew Hour alang sa mga batan-on gibase usab sa ordinansa sa dakbayan nga nagdili na sa mga menor de edad sa paggawas sa ilang balay sa panahon sa kagabhion.

Naglakip sa mga barangay nga mipatuman og balaod sa curfew gawas sa Subangdaku, mao ang Paknaan, Pagsabungan, Basak, Ibabao, Estancia ug uban pa.

Si Manatad miingon nga ang mga menor de edad nga ilang madakpan nga magsuroy-suroy sa lawom nang gabii ilang pasakyon sa sakyanan sa magpatrolyang mga barangay tanod   ug ihatod sa ilang balay.

Kini aron pagsiguro nga luwas ang ilang paglakaw-lakaw sa kadalanan ug labaw sa tanan kapahimangnoan sila sa ilang mga ginikanan. (WC)(BANAT NEWS)